ડોનાલ્ડ ટ્રમ્પે ફરી ભારતને આપી ધમકી: રશિયાથી તેલ ખરીદવા પર વધારી શકે છે ટેક્સ, જોકે PM મોદી માટે કહી આ મોટી વાત

US Tariffs on India: અમેરિકા અને ભારત વચ્ચેના વેપાર સંબંધોમાં ફરી એકવાર ગરમાવો જોવા મળી રહ્યો છે. અમેરિકાના રાષ્ટ્રપતિ ડોનાલ્ડ ટ્રમ્પે સોમવાર, 5 જાન્યુઆરી 2026ના રોજ રશિયા પાસેથી તેલ ખરીદવાના મુદ્દે ભારતને ફરી એકવાર ચેતવણી આપી છે. આ નિવેદન બંને દેશોના આર્થિક સંબંધો માટે ચિંતાનો વિષય બની શકે છે.

ટ્રમ્પની ખુલ્લી ધમકી: સાથ આપો નહીંતર ટેક્સ વધશે

વ્હાઇટ હાઉસ દ્વારા બહાર પાડવામાં આવેલી એક ઓડિયો ક્લિપમાં ડોનાલ્ડ ટ્રમ્પ સ્પષ્ટપણે ચેતવણી આપતા સંભળાય છે. તેમણે કહ્યું છે કે જો ભારત રશિયા પાસેથી તેલ ખરીદવાના મામલે અમેરિકાનો સાથ નહીં આપે, તો ભારત પરના ટેક્સમાં ઝડપથી વધારો કરવામાં આવશે. ટ્રમ્પનું માનવું છે કે રશિયા પર દબાણ લાવવા માટે ભારતે તેલ ખરીદવાનું બંધ કરવું જોઈએ અને જો ભારત આમ કરવામાં નિષ્ફળ જશે તો અમેરિકા આકરા પગલાં લેશે.

PM મોદીના વખાણ અને દબાણની રણનીતિ

એક તરફ ટ્રમ્પે ધમકી આપી છે, તો બીજી તરફ તેમણે ભારતીય વડાપ્રધાન નરેન્દ્ર મોદીના વખાણ પણ કર્યા છે. ટ્રમ્પે કહ્યું કે, "મોદી એક ખૂબ જ સારા માણસ છે અને તેઓ મૂળભૂત રીતે મને ખુશ કરવા માંગતા હતા." ટ્રમ્પે વધુમાં ઉમેર્યું કે PM મોદી જાણે છે કે હું ખુશ નથી અને તેમને મને ખુશ રાખવો મહત્વપૂર્ણ લાગ્યું. જોકે, આ વખાણની સાથે જ ટ્રમ્પે પોતાની વેપારી વૃત્તિ બતાવતા કહ્યું કે, "તેઓ વેપાર કરે છે અને અમે તેમના પર બહુ જલ્દી ટેક્સ વધારી શકીએ છીએ."