Myntra પર EDની મોટી કાર્યવાહી: FEMA હેઠળ 1654 કરોડના FDI ઉલ્લંઘનનો કેસ નોંધાયો

Myntra ED action FEMA violation: એનફોર્સમેન્ટ ડિરેક્ટોરેટ (ED) એ ફ્લિપકાર્ટ-સમર્થિત ઈ-કોમર્સ પ્લેટફોર્મ Myntra, તેની સંલગ્ન કંપનીઓ અને ડિરેક્ટર્સ સામે ફોરેન એક્સચેન્જ મેનેજમેન્ટ એક્ટ (FEMA), 1999 હેઠળ મોટી કાર્યવાહી કરી છે. EDએ Myntra Designs Private Limited સામે 1654.35 કરોડના વિદેશી રોકાણ (FDI) નિયમોના ઉલ્લંઘનનો આરોપ લગાવીને કેસ નોંધ્યો છે. આ કેસ FEMAની કલમ 16(3) હેઠળ નોંધાયો છે, જેમાં Myntra અને તેની સંલગ્ન કંપનીઓ પર મલ્ટી-બ્રાન્ડ રિટેલ ટ્રેડિંગને હોલસેલ કેશ એન્ડ કેરી બિઝનેસ તરીકે ખોટી રીતે રજૂ કરવાનો આરોપ છે.

શું છે આખો મામલો?

EDના બેંગલુરુ ઝોનલ ઓફિસે આ કાર્યવાહી વિશ્વસનીય માહિતીના આધારે શરૂ કરી છે. તપાસમાં જાણવા મળ્યું કે Myntraએ હોલસેલ બિઝનેસના નામે 1654.35 કરોડથી વધુનું વિદેશી રોકાણ લીધું હતું. જોકે, વાસ્તવમાં, Myntraએ તેના તમામ પ્રોડક્ટ્સ Vector E-Commerce Private Limitedને વેચ્યા, જે એક જ ગ્રૂપની કંપની છે. Vectorએ આ પ્રોડક્ટ્સને સામાન્ય ગ્રાહકોને રિટેલમાં વેચી, જે B2C ટ્રાન્ઝેક્શન તરીકે ગણાય. આ રીતે, Myntraએ B2B ટ્રાન્ઝેક્શન બતાવીને FDI નિયમોનું ઉલ્લંઘન કર્યું.

FDI નીતિ અનુસાર હોલસેલ કંપની તેના ગ્રૂપની અન્ય કંપનીને માત્ર 25% સુધીનું વેચાણ કરી શકે છે. પરંતુ Myntraએ 100% પ્રોડક્ટ્સ Vectorને વેચ્યા જે FEMAની કલમ 6(3)(b) અને 1 એપ્રિલ 2010 તેમજ 1 ઓક્ટોબર 2010ની FDI નીતિઓનું સ્પષ્ટ ઉલ્લંઘન છે. EDએ આ મામલે ન્યાયિક અધિકારી સમક્ષ ફરિયાદ નોંધી છે.

Myntraનું શું છે કહેવું?

Myntra જે Walmart Inc.ની માલિકીની કંપની છે,એ જણાવ્યું કે તેમને હજુ સુધી ED તરફથી કોઈ ફરિયાદ કે દસ્તાવેજો મળ્યા નથી. કંપનીએ એક નિવેદનમાં કહ્યું, અમે સંપૂર્ણપણે સહકાર આપવા માટે તૈયાર છીએ અને જરૂર પડ્યે અધિકારીઓ સાથે સંપૂર્ણ સહયોગ કરીશું.

આ કેસની તપાસ હજુ ચાલુ છે, અને ED આગળની કાર્યવાહી હેઠળ વ્યક્તિગત જવાબદારીઓ અને સંભવિત દંડની વિગતો નક્કી કરશે. આ મામલો ભારતમાં ઈ-કોમર્સ કંપનીઓ પર વધતી નિયમનકારી દેખરેખનો એક ભાગ છે, ખાસ કરીને જે કંપનીઓ વિદેશી રોકાણ પર આધારિત છે.