બાંગ્લાદેશના પૂર્વ વડા પ્રધાન શેખ હસીનાને 6 મહિનાની જેલની સજા, અવમાનના કેસમાં કોર્ટનો નિર્ણય

Sheikh Hasina: બાંગ્લાદેશના પૂર્વ વડા પ્રધાન શેખ હસીનાને બુધવારે (2 જુલાઈ) કોર્ટના અવમાનના કેસમાં આંતરરાષ્ટ્રીય ગુના ટ્રિબ્યુનલ (ICT) દ્વારા છ મહિનાની જેલની સજા ફટકારવામાં આવી છે. 'ઢાકા ટ્રિબ્યુન' અખબારે અહેવાલ આપ્યો છે કે, ન્યાયાધીશ મોહમ્મદ ગુલામ મુર્તઝા મજુમદારની આગેવાની હેઠળની આંતરરાષ્ટ્રીય ગુના ટ્રિબ્યુનલ-1 ની ત્રણ સભ્યોની બેન્ચે આ નિર્ણય જારી કર્યો છે. આ જ નિર્ણયમાં, કોર્ટે ગાયબંધાના ગોવિંદગંજના શકીલ અકંદ બુલબુલને બે મહિનાની જેલની સજા ફટકારી છે.

બાંગ્લાદેશના પૂર્વ વડા પ્રધાન શેખ હસીના 11 મહિના પહેલા બાંગ્લાદેશથી ભારત ભાગી ગયા હતા. 11 મહિના પહેલા વડા પ્રધાન પદ પરથી રાજીનામું આપ્યા પછી અને દેશ છોડીને ગયા પછી આ પહેલી વાર છે જ્યારે આવામી લીગના નેતા શેખ હસીનાને કોઈ કેસમાં સજા ફટકારવામાં આવી છે.

શું છે આખો મામલો?

અગાઉ 17 જૂનના રોજ, આઇસીટીએ બે મુખ્ય બાંગ્લાદેશી અખબારોમાં એક નોટિસ પ્રકાશિત કરી હતી જેમાં શેખ હસીના અને અસદુઝમાન ખાન કમાલને 24 જૂન સુધીમાં આત્મસમર્પણ કરવાનો નિર્દેશ આપ્યો હતો. નોટિસ અનુસાર, તેમને આંતરરાષ્ટ્રીય ગુનાઓ (ટ્રિબ્યુનલ-1) કાર્યવાહી નિયમો 2010 (સુધાર્યા મુજબ), 2025 ની કલમ 31 હેઠળ 24 જૂનના રોજ ટ્રિબ્યુનલ સમક્ષ આત્મસમર્પણ કરવાનો આદેશ આપવામાં આવ્યો છે. અન્યથા, 1973 ના કાયદાની કલમ 10A હેઠળ તેમની ગેરહાજરીમાં ટ્રાયલ હાથ ધરવામાં આવશે.

1 જૂનના રોજ, ફરિયાદ પક્ષે ત્રણેય પર હત્યા, હત્યાનો પ્રયાસ, ત્રાસ અને ઘાતક હથિયારોના ઉપયોગ જેવા ગંભીર ગુનાઓનો આરોપ મૂક્યો હતો. આરોપોને ધ્યાનમાં લેતા, કોર્ટે શેખ હસીના અને અસદુઝમાન ખાન કમાલ સામે ધરપકડ વોરંટ પણ જારી કર્યું હતું. તે જ દિવસે અબ્દુલ્લા અલ-મામુનની ધરપકડ કરવામાં આવી હતી.

આવામી લીગે આ નિર્ણયનો કર્યો વિરોધ

શેખ હસીનાની પાર્ટી આવામી લીગે ટ્રિબ્યુનલ દ્વારા શરૂ કરાયેલી આ કાર્યવાહીની સખત નિંદા કરી છે. પક્ષે તેને શો ટ્રાયલ (બનાવટી કેસ) ગણાવ્યો છે. અવામી લીગના મતે, આ કેસ કથિત રીતે મોહમ્મદ યુનુસના નેતૃત્વ હેઠળની બિન-ચૂંટાયેલી અને અલોકતાંત્રિક સરકાર દ્વારા ચલાવવામાં આવી રહ્યો છે.