યુક્રેનથી પશ્ચિમ એશિયા: PM મોદી અને મેક્રોંની ફોન પર શાંતિ સ્થાપવાની ચર્ચા

G7, BRICS: વૈશ્વિક અશાંતિના માહોલ વચ્ચે ભારતના વડાપ્રધાન નરેન્દ્ર મોદીએ ગુરુવારે ફ્રાંસના રાષ્ટ્રપતિ ઇમેન્યુઅલ મેક્રોં સાથે ફોન પર મહત્વની ચર્ચા કરી. આ વાતચીતમાં યુક્રેન અને પશ્ચિમ એશિયામાં ચાલી રહેલા સંઘર્ષોના શાંતિપૂર્ણ ઉકેલ માટેના પ્રયાસો પર ધ્યાન કેન્દ્રિત રહ્યું. બંને નેતાઓએ ભારત-ફ્રાંસની રણનીતિક સાઝેદારીને વધુ મજબૂત કરવાની પ્રતિબદ્ધતા પણ વ્યક્ત કરી.

PM મોદીનું નિવેદન

PM મોદીએ X પર ટ્વીટ કરીને જણાવ્યું, “મારા મિત્ર રાષ્ટ્રપતિ મેક્રોં સાથે ખૂબ સારી વાતચીત થઈ. યુક્રેન અને પશ્ચિમ એશિયામાં સંઘર્ષોના શાંતિપૂર્ણ ઉકેલ માટે વિચારોનું આદાન-પ્રદાન થયું. ભારત-ફ્રાંસ રણનીતિક સાઝેદારીને વધુ મજબૂત કરવા અમે પ્રતિબદ્ધ છીએ.”

મેક્રોંનું ટ્વીટ

ફ્રાંસના રાષ્ટ્રપતિ મેક્રોંએ X પર લખ્યું, “મેં હમણાં જ PM નરેન્દ્ર મોદી સાથે વાત કરી. અમે યુક્રેન યુદ્ધ અંગે અમારી સ્થિતિનું સમન્વય કર્યું, જેથી યુક્રેન અને યુરોપની સુરક્ષા સાથે ન્યાયી અને સ્થાયી શાંતિ તરફ આગળ વધી શકીએ. અમે આર્થિક આદાન-પ્રદાન અને રણનીતિક સાઝેદારીને મજબૂત કરવા સહમત થયા, જે અમારી સ્વતંત્રતાની ચાવી છે.”

AI સમિટ અને G7-BRICSની તૈયારી

મેક્રોંએ ઉમેર્યું કે ફેબ્રુઆરી 2025માં પેરિસમાં યોજાયેલ AI એક્શન સમિટ બાદ હવે બંને નેતાઓ 2026માં નવી દિલ્હીમાં યોજાનાર AI ઇમ્પેક્ટ સમિટની સફળતા માટે કામ કરશે. આ ઉપરાંત, 2026માં ફ્રાંસની G7 અધ્યક્ષતા અને ભારતની BRICS અધ્યક્ષતાની તૈયારી માટે બંને દેશો સાથે મળીને કામ કરશે.