India-China relations: ટ્રમ્પના ટેરિફ વિરુદ્ધ ભારતની પડખે ચીન, રાજદૂતે લગાવી લતાડ

India-China relations: ભારતમાં ચીનના રાજદૂત શૂ ફીહોંગે અમેરિકી રાષ્ટ્રપતિ ડોનાલ્ડ ટ્રમ્પ દ્વારા ભારત પર લાદવામાં આવેલા 50% ટેરિફનો તીવ્ર વિરોધ કર્યો છે. તેમણે જણાવ્યું કે ચીન આ એકતરફી ટેરિફની સામે ભારતની પડખે મજબૂતીથી ઊભું છે. રાજદૂતે એક્સ પર પોસ્ટ કરીને કહ્યું, “ચીન એકતરફી ટેરિફનો સખત વિરોધ કરે છે. ચુપ રહેવાથી દાદાગીરીને જ પ્રોત્સાહન મળે છે. ચીન ભારત સાથે ઊભું રહેશે.”

ભારત-ચીન સંબંધોમાં સુધારો

શૂ ફીહોંગે ગયા વર્ષે ઓક્ટોબર 2024માં રશિયાના કઝાનમાં યોજાયેલી બ્રિક્સ સમિટ દરમિયાન ભારતના વડાપ્રધાન નરેન્દ્ર મોદી અને ચીનના રાષ્ટ્રપતિ શી જિનપિંગની મુલાકાતનો ઉલ્લેખ કર્યો. તેમણે જણાવ્યું કે આ મુલાકાત બાદ બંને દેશો વચ્ચે સંબંધોમાં સકારાત્મક પરિવર્તન આવ્યું છે. વિવિધ સ્તરે સંવાદ અને આદાન-પ્રદાન ફરી શરૂ થયા છે, જેના સારા પરિણામો જોવા મળી રહ્યા છે.

વેપાર અને ડાયરેક્ટ ફ્લાઈટ્સ પર ભાર

ચીની રાજદૂતે જણાવ્યું કે ચીનનું બજાર ભારતીય વસ્તુઓ માટે ખુલ્લું છે. તેમણે કહ્યું, “અમે ભારતની તમામ વસ્તુઓનું ચીની બજારમાં સ્વાગત કરીએ છીએ. બંને દેશો સાથે મળીને વિકાસની રણનીતિઓ આગળ વધારી શકે છે.” આ ઉપરાંત, 2020ની ગલવાન અથડામણ બાદ બંધ થયેલી ડાયરેક્ટ ફ્લાઈટ્સ ફરી શરૂ કરવા માટે ચર્ચાઓ ચાલી રહી છે, જે બંને દેશો વચ્ચેના આર્થિક સંબંધોને વધુ મજબૂત કરશે.

રણનીતિક ભરોસો અને એશિયાની સ્થિરતા

રાજદૂતે ભારપૂર્વક જણાવ્યું કે ભારત અને ચીન એશિયાની અર્થવ્યવસ્થાના “બે એન્જિન” છે. બંને દેશોએ રણનીતિક ભરોસો વધારવો જોઈએ અને એશિયાની સુરક્ષા તેમજ સ્થિરતા માટે સાથે મળીને કામ કરવું જોઈએ. તેમણે કહ્યું કે ભારત-ચીન સંબંધો માત્ર બંને દેશો માટે જ નહીં, પરંતુ સમગ્ર વિશ્વ માટે ફાયદાકારક છે.