Agni-5 missile: ભારતે અગ્નિ-5 મિસાઇલનું કર્યું સફળ પરીક્ષણ, 5000 કિમી સુધી પરમાણુ શસ્ત્રો લઈ જવામાં સક્ષમ

Agni-5 missile: ભારતે વૈશ્વિક અસ્થિરતાના સમયમાં એક મહત્વપૂર્ણ સફળતા હાંસલ કરી છે. ઓડિશાના ચાંદીપુર સ્થિત ઇન્ટિગ્રેટેડ ટેસ્ટ રેન્જ ખાતેથી અગ્નિ-5 મિસાઇલનું સફળ પરીક્ષણ કરવામાં આવ્યું. આ પરીક્ષણ ભારતના સ્ટ્રેટેજિક ફોર્સ કમાન્ડના નેતૃત્વ હેઠળ થયું હતું અને તેમાં તમામ ઓપરેશનલ અને ટેકનિકલ પરિમાણોની સફળતાપૂર્વક ચકાસણી કરવામાં આવી.

અગ્નિ-5ની ખાસિયતો

અગ્નિ-5 એ ભારતની સૌથી એડવાન્સ્ડ મીડિયમ રેન્જની બેલિસ્ટિક મિસાઇલ છે, જે 5000 કિલોમીટરની રેન્જ ધરાવે છે. આ મિસાઇલ ન્યુક્લિયર હથિયારોને લઈ જવાની ક્ષમતા ધરાવે છે, જેનાથી તે ચીન, પાકિસ્તાન અને એશિયાના મોટાભાગના ભાગોને નિશાન બનાવી શકે છે. આ ઉપરાંત, યુરોપના કેટલાક વિસ્તારો પણ તેની રેન્જમાં આવે છે.

MIRV ટેકનોલોજીનો ઉપયોગ

અગ્નિ-5 મિસાઇલ અદ્યતન નેવિગેશન, ગાઇડન્સ, વોરહેડ અને એન્જિન ટેકનોલોજીથી સજ્જ છે, જે તેની ચોકસાઈ અને મારક ક્ષમતાને વધારે છે. આ મિસાઇલમાં MIRV (મલ્ટિપલ ઇન્ડિપેન્ડન્ટલી ટાર્ગેટેબલ રી-એન્ટ્રી વ્હીકલ) ટેકનોલોજીનો ઉપયોગ કરવામાં આવ્યો છે, જેના દ્વારા એક જ મિસાઇલ દ્વારા અનેક ન્યુક્લિયર હથિયારો વિવિધ નિશાનો પર હુમલો કરી શકે છે. આવી ક્ષમતા ફક્ત ગણ્યાગાંઠ્યા દેશો પાસે જ છે.

DRDOનું યોગદાન

અગ્નિ-5 મિસાઇલનું નિર્માણ રક્ષા સંશોધન અને વિકાસ સંસ્થા (DRDO) દ્વારા કરવામાં આવ્યું છે. આ મિસાઇલનું પહેલું પરીક્ષણ એપ્રિલ 2012માં થયું હતું. તેની રેન્જ અને ક્ષમતાને ધ્યાનમાં રાખીને ભારતની લાંબા ગાળાની સુરક્ષા જરૂરિયાતોને પહોંચી વળવા માટે આ મિસાઇલ ખાસ ડિઝાઇન કરવામાં આવી છે. અગ્નિ શ્રેણીની અન્ય મિસાઇલો (અગ્નિ-1થી 4)ની રેન્જ 700થી 3500 કિલોમીટર છે અને તે પહેલેથી જ ભારતીય સેનામાં તૈનાત કરવામાં આવી છે.