રશિયાથી તેલ આયાત બંધ થાય તો ભારતનો ખર્ચ 9 અબજ ડોલર વધી શકે: SBI રિપોર્ટ

India oil imports: ભારત જો રશિયાથી ક્રૂડ ઓઇલની આયાત બંધ કરે તો ચાલુ નાણાકીય વર્ષ (FY26)માં તેનું ફ્યૂલ બિલ 9 અબજ ડોલર અને આગામી વર્ષ FY27માં 11.7 અબજ ડોલર સુધી વધી શકે છે. આ અંદાજ ભારતીય સ્ટેટ બેન્કના તાજેતરના રિપોર્ટમાં રજૂ કરવામાં આવ્યો છે.

રશિયાનો વૈશ્વિક તેલ પુરવઠામાં મોટો હિસ્સો

SBI રિપોર્ટ મુજબ, વૈશ્વિક ક્રૂડ ઓઇલ પુરવઠામાં રશિયાનો 10 ટકા હિસ્સો છે. જો વિશ્વના તમામ દેશો રશિયાથી તેલ ખરીદવાનું બંધ કરે અને અન્ય દેશો ઉત્પાદન ન વધારે તો ક્રૂડ ઓઇલના ભાવમાં 10 ટકાનો વધારો થઈ શકે છે. આનાથી ભારતના તેલ આયાત ખર્ચ પર નોંધપાત્ર અસર પડશે.

રશિયા બન્યું ભારતનું સૌથી મોટું તેલ સપ્લાયર

યુક્રેન યુદ્ધ બાદ 2022થી ભારતે રશિયાથી તેલ આયાતમાં નોંધપાત્ર વધારો કર્યો છે. પશ્ચિમી દેશોના પ્રતિબંધોને કારણે રશિયા તેલ 60 ડોલર પ્રતિ બેરલની કેપ સાથે ડિસ્કાઉન્ટ પર ઉપલબ્ધ થયું, જેનાથી ભારતે ઊર્જા સુરક્ષા મજબૂત કરી. પરિણામે ભારતના કુલ તેલ આયાતમાં રશિયાનો હિસ્સો FY20માં 1.7 ટકાથી વધીને FY25માં 35.1 ટકા થયો. FY25માં ભારતે કુલ 245 મિલિયન મેટ્રિક ટન (MMT) તેલ આયાત કર્યું, જેમાંથી 88 MMT રશિયાથી આવ્યું.

યુક્રેન યુદ્ધ પહેલાં ઇરાક હતું મોખરે

યુક્રેન યુદ્ધ પહેલાં ઇરાક ભારતનું સૌથી મોટું ક્રૂડ ઓઇલ સપ્લાયર હતું, જેના પછી સાઉદી અરેબિયા અને યુએઈનો નંબર આવતો. ભારતીય રિફાઇનર્સ મધ્ય પૂર્વના દેશો સાથે વાર્ષિક કોન્ટ્રાક્ટ દ્વારા તેલ ખરીદે છે, જે માસિક વધારાની સપ્લાયની સુગમતા આપે છે. રશિયા પર પ્રતિબંધો બાદ ભારતે અમેરિકા, પશ્ચિમ આફ્રિકા અને અઝરબૈજાનથી પણ તેલ ખરીદવાનું શરૂ કર્યું.