મેઘાનું તોફાન: ગુજરાતમાં 226 તાલુકામાં વરસાદ, જૂનાગઢ-પોરબંદરમાં 10 ઈંચથી વધુ

Gujarat Rain 2025: ગુજરાતમાં મેઘાનું તોફાન ચાલુ છે! રાજ્યના 226 તાલુકામાં છેલ્લા 24 કલાકમાં હળવાથી અતિ ભારે વરસાદ નોંધાયો છે. ખાસ કરીને જૂનાગઢ અને પોરબંદર જિલ્લાઓમાં મેઘોની તોફાની બેટિંગ જોવા મળી, જ્યાં 10 ઈંચથી વધુ વરસાદ ખાબક્યો. સૌથી વધુ વરસાદ જૂનાગઢના મેંદરડામાં 13.31 ઈંચ નોંધાયો, જ્યારે કેશોદમાં 11.22 ઈંચ અને વંથલીમાં 10.39 ઈંચ વરસાદ પડ્યો. પોરબંદરમાં પણ 10.24 ઈંચ વરસાદે ખેડૂતો અને સ્થાનિકોને ચિંતામાં મૂક્યા છે.

સ્ટેટ ઈમરજન્સી ઓપરેશન સેન્ટરના આંકડા પ્રમાણે, 20 ઓગસ્ટ 2025, સવારે 6 વાગ્યાથી 21 ઓગસ્ટ 2025, સવારે 6 વાગ્યા સુધીના 24 કલાકમાં રાજ્યના 226 તાલુકામાં વરસાદે હાજરી પૂરાવી. આમાંથી 4 તાલુકામાં 10 ઈંચથી વધુ, 16 તાલુકામાં 5 થી 10 ઈંચ અને 79 તાલુકામાં 1 થી 5 ઈંચ વરસાદ નોંધાયો. દક્ષિણ ગુજરાત અને સૌરાષ્ટ્રના વિસ્તારોમાં ભારે વરસાદે જનજીવનને અસર કરી છે.

11 જિલ્લામાં રેડ એલર્ટ

હવામાન વિભાગે આજે ગુરુવારે દક્ષિણ ગુજરાત અને સૌરાષ્ટ્રના 11 જિલ્લાઓમાં ભારેથી અતિ ભારે વરસાદની આગાહી સાથે રેડ એલર્ટ જાહેર કર્યું છે. આ જિલ્લાઓમાં સુરત, નવસારી, વલસાડ, દમણ, દાદરા નગર હવેલી, પોરબંદર, દ્વારકા, અમરેલી, ભાવનગર, ગીર સોમનાથ અને દીવનો સમાવેશ થાય છે. સ્થાનિક વહીવટીતંત્રને સતર્ક રહેવા અને જરૂરી પગલાં લેવા સૂચના આપવામાં આવી છે.