ટ્રમ્પની ટેરિફ નીતિ: ભારત પર સજા, ચીનને રાહત, રશિયન તેલનો ફાયદો ઉઠાવે છે ડ્રેગન

Trump's tariff policy: અમેરિકી રાષ્ટ્રપતિ ડોનાલ્ડ ટ્રમ્પની ટેરિફ નીતિએ વૈશ્વિક વેપારમાં ખળભળાટ મચાવ્યો છે. ભારત પર રશિયન તેલની ખરીદીને લઈને 50% ટેરિફ લાદવામાં આવ્યો છે, જ્યારે ચીનને આવા કોઈ પ્રતિબંધનો સામનો કરવો પડ્યો નથી. આ નીતિથી ચીન રશિયન તેલનું આયાત વધારીને ફાયદો ઉઠાવી રહ્યું છે, જે ભારત માટે નુકસાનકારક સાબિત થઈ શકે છે.

અમેરિકાએ ભારત પર ઓગસ્ટ 2025માં 25% ટેરિફ લાદ્યો હતો અને ત્યારબાદ વધુ 25%નું ટેરિફ ઉમેરીને કુલ 50% ટેરિફ લાગુ કર્યો. આ પગલું ભારતની રશિયન તેલની ખરીદીને લઈને લેવામાં આવ્યો, જેને ટ્રમ્પે યુક્રેન યુદ્ધને ટેકો આપતું ગણાવ્યું. ભારતે આ ટેરિફને "અન્યાયી અને બિનવાજબી" ગણાવીને ટીકા કરી છે. ભારતના વિદેશ મંત્રાલયે જણાવ્યું કે, આ નિર્ણય 1.4 અબજ લોકોની ઊર્જા સુરક્ષાને અસર કરે છે, કારણ કે ભારત પોતાની 75-80% ક્રૂડ ઓઇલની જરૂરિયાત આયાત દ્વારા પૂરી કરે છે, જેમાંથી 38% રશિયાથી આવે છે.

બીજી તરફ, ચીન પર આવા કોઈ ટેરિફ લાદવામાં આવ્યા નથી. રિપોર્ટ્સ અનુસાર, ચીનની રિફાઇનરીઓએ ઓક્ટોબર અને નવેમ્બર 2025 માટે રશિયન ક્રૂડ ઓઇલના 15થી વધુ શિપમેન્ટ સુરક્ષિત કર્યા છે, જેમાં દરેક શિપમેન્ટમાં 700,000થી 10 લાખ બેરલ તેલ છે. આ શિપમેન્ટ ભારત માટે નિર્ધારિત હતા, પરંતુ અમેરિકી ટેરિફના દબાણે ચીને આ તકનો લાભ ઉઠાવ્યો. રશિયન તેલ અન્ય દેશોની તુલનામાં $3 પ્રતિ બેરલ સસ્તું હોવાથી ચીનને આર્થિક ફાયદો પણ થઈ રહ્યો છે.

ભારતે સ્પષ્ટ કર્યું છે કે તે પોતાના રાષ્ટ્રીય હિતો સાથે કોઈ સમજૂતી નહીં કરે. ભારતના ઉચ્ચ અધિકારીઓએ જણાવ્યું કે, તેલની ખરીદીનો નિર્ણય આર્થિક અને વાણિજ્યિક આધારે લેવામાં આવશે. જો ભારત રશિયન તેલની આયાત બંધ કરે તો તેનું આયાત બિલ $9 બિલિયનથી $12 બિલિયન વધી શકે છે, જે ભારતીય અર્થતંત્ર પર ભારે બોજ નાખશે.

ચીનની આ આક્રમક રણનીતિ ભારત માટે ચેતવણી છે. નિષ્ણાતોનું માનવું છે કે ટ્રમ્પની નીતિ ભારતને રશિયા અને ચીન સાથેના સંબંધો પર પુનર્વિચાર કરવા મજબૂર કરી શકે છે. ભારતે હવે વૈકલ્પિક બજારો અને વેપાર રણનીતિઓ પર ધ્યાન આપવું પડશે, જેથી તેની ઊર્જા સુરક્ષા અને આર્થિક હિતોનું રક્ષણ થઈ શકે.

આ પણ વાંચો- ભારત-જાપાનની મજબૂત ભાગીદારી: PM મોદીની જાપાન યાત્રામાં AI અને સ્ટાર્ટઅપ્સ પર મોટી જાહેરાતની આશા