US-China Tariff War: ટ્રમ્પની ચીન સામે ગીદડભભકી, ટેરિફ યુદ્ધમાં શું થયું અને શું થશે?

US-China Tariff War: અમેરિકાના રાષ્ટ્રપતિ ડોનાલ્ડ ટ્રમ્પે ચીન સામે વેપાર યુદ્ધમાં ઘણી વખત મોટી-મોટી ધમકીઓ આપી છે, પરંતુ ઘણી વખત તે ગીદડભભકી જ રહી છે. તેમના નેતૃત્વમાં અમેરિકા અને ચીન વચ્ચેના વેપાર સંબંધોમાં ઘણા ઉતાર-ચઢાવ આવ્યા છે. ચાલો જાણીએ આ ટેરિફ યુદ્ધની શરૂઆતથી લઈને હવેની સ્થિતિ સુધી શું થયું.

ટેરિફ યુદ્ધની શરૂઆત

એપ્રિલમાં ટ્રમ્પે ચીન પર 34% ટેરિફ લગાવવાની જાહેરાત કરી, જેનાથી આ વેપાર યુદ્ધની શરૂઆત થઈ. ચીને પણ તરત જવાબી ટેરિફની ઘોષણા કરી. આનાથી ટ્રમ્પ ચિડાયા અને તેમણે ચીન પર 34% ટેરિફ ઉપરાંત 50% વધારાનું ટેરિફ લગાવવાની ધમકી આપી. પરંતુ ચીન આ ધમકીઓથી ડર્યું નહીં. 8 એપ્રિલે ટ્રમ્પે ચીન પર 104% ટેરિફ લગાવવાની જાહેરાત કરી, જે 9 એપ્રિલથી લાગુ થવાનું હતું. ચીને જવાબમાં અમેરિકી માલ પર 84% ટેરિફ લગાવી દીધું.

ટ્રમ્પ આનાથી બેકફૂટ પર આવ્યા અને ચીનને વાતચીત માટે આમંત્રણ આપ્યું, પરંતુ ચીને આમંત્રણ નકારી દીધું. આથી ટ્રમ્પે ટેરિફને 104%થી વધારીને 125% કરી દીધું અને પછી 145% સુધી લઈ ગયા. ચીને આના જવાબમાં અમેરિકી એરક્રાફ્ટ ઉત્પાદક કંપની બોઇંગ પાસેથી ડિલિવરી ન લેવાનો આદેશ આપ્યો. આથી ટ્રમ્પે 16 એપ્રિલે ટેરિફને 145%થી વધારીને 245% કરવાની ધમકી આપી, જો કે તે લાગુ ન થઈ.

ચીનનો જવાબ અને વાતચીતની શરૂઆત

ચીન આ ધમકીઓથી ડગ્યું નહીં અને તેણે વાતચીતનો પ્રસ્તાવ મૂક્યો. 9 મે ના રોજ ટ્રમ્પે ચીન પર 145% ટેરિફ ઘટાડીને 80% કરવાનો પ્રસ્તાવ મૂક્યો, જ્યારે ચીને અમેરિકા પર 125% ટેરિફ લગાવ્યું હતું. લાંબી વાતચીત બાદ 11 જૂને બંને દેશો વચ્ચે સમજૂતી થઈ. અમેરિકાએ ચીન પર ટેરિફ ઘટાડીને 55% કર્યું, જ્યારે ચીને અમેરિકા પર ટેરિફ 10% કર્યું.

ખાસ વાત એ છે કે ટ્રમ્પે ભારત પર રશિયન તેલની ખરીદી માટે 25% વધારાનું ટેરિફ લગાવ્યું, પરંતુ ચીન, જે રશિયન તેલનું સૌથી મોટું ખરીદદાર છે, તેની સામે કોઈ પગલું ન લીધું. એજ રીતે, ટ્રમ્પે બ્રિક્સ દેશો પર 10% વધારાનું ટેરિફ લગાવવાની જાહેરાત કરી, પરંતુ ચીનને ફરી છૂટ આપી.