FPI: ભારતીય શેરોમાં FPI રોકાણ પડ્યું ધીમુ, ઓગસ્ટમાં રૂપિયા 12,262 કરોડનું કર્યું રોકાણ

FPI: છેલ્લા ત્રણ મહિનામાં ભારતીય શેરબજારોમાં ભારે રોકાણ કર્યા બાદ વિદેશી પોર્ટફોલિયો રોકાણકારો (FPIs) દ્વારા રોકાણમાં મંદી જોવા મળી રહી છે. ક્રૂડ ઓઈલની વધતી કિંમતો અને ફુગાવાના જોખમોના પુનઃ ઉદભવ વચ્ચે FPIsએ ઓગસ્ટમાં ભારતીય શેરબજારોમાં રૂપિયા 12,262 કરોડનું રોકાણ કર્યું છે. ડિપોઝિટરી ડેટા અનુસાર વિદેશી પોર્ટફોલિયો રોકાણકારોએ ઓગસ્ટમાં ભારતીય શેરોમાં ચોખ્ખું રૂપિયા 12,262 કરોડનું રોકાણ કર્યું હતું. આ આંકડામાં પ્રાથમિક બજાર અને જથ્થાબંધ સોદા દ્વારા કરવામાં આવેલા રોકાણનો સમાવેશ થાય છે.

નિષ્ણાતોનો અભિપ્રાય

હિમાંશુ શ્રીવાસ્તવે, એસોસિયેટ ડિરેક્ટર-મેનેજર રિસર્ચ, મોર્નિંગસ્ટોર ઈન્ડિયાએ જણાવ્યું હતું કે, “FPIs સંપૂર્ણ 'યુ-ટર્ન' લેવાને બદલે 'જુઓ અને રાહ જુઓ' નીતિ અપનાવી રહ્યાં છે. વૈશ્વિક અર્થતંત્રમાં અનિશ્ચિતતા યથાવત છે. આ કારણે એફપીઆઈના પ્રવાહમાં વધઘટ જોવા મળશે.

શ્રીવાસ્તવે ઓગસ્ટમાં FPI રોકાણમાં ઘટાડા માટેના મુખ્ય પરિબળો તરીકે ક્રૂડ ઓઈલના ઊંચા ભાવ અને ફુગાવાના જોખમોના પુનઃઉદભવને ટાંક્યા હતા. તેમણે કહ્યું કે આ સિવાય અમેરિકામાં બોન્ડ યીલ્ડમાં વધારાને કારણે FPIs જોખમી બજારોમાંથી તેમનું રોકાણ પાછું ખેંચી રહ્યા છે. શ્રીવાસ્તવે જણાવ્યું હતું કે ભારતીય શેરબજારોમાં સતત વધારાને કારણે શેરનું મૂલ્યાંકન કેટલાક રોકાણકારોના સંતોષકારક સ્તરથી ઉપર ગયું છે.