Market Outlook: શેરબજારમાં શાનદાર રિકવરી, જાણો 10 જૂને કેવી રહેશે સેન્સેક્સ અને નિફ્ટીની ચાલ

Market Outlook: શેરબજારમાં તાજેતરમાં આવેલા મોટા કડાકા બાદ 9 જૂનના રોજ બજારમાં રાહતની રિકવરી જોવા મળી છે. આઇટી અને મીડિયા સિવાયના તમામ સેક્ટરમાં જોવા મળેલી જોરદાર ખરીદીના ટેકે નિફ્ટી 23,200 ની સપાટી પાર કરવામાં સફળ રહ્યો છે. ટ્રેડિંગ સેશનના અંતે સેન્સેક્સ 394.50 પોઈન્ટ (0.54 ટકા) ના ઉછાળા સાથે 73,918.76 ના સ્તર પર બંધ થયો હતો. જ્યારે નિફ્ટી 50 ઇન્ડેક્સ 119.10 પોઈન્ટ (0.52 ટકા) વધીને 23,242.10 પર બંધ રહ્યો હતો.

બજારમાં ઓવરઓલ ટ્રેન્ડ પોઝિટિવ રહ્યો હતો, જેમાં 2694 શેરો વધ્યા હતા, 1343 શેરો ઘટ્યા હતા અને 175 શેરોના ભાવમાં કોઈ ફેરફાર નોંધાયો ન હતો. આજના ટોપ ગેનર્સમાં ઇન્ટરગ્લોબ એવિએશન, જિયો ફાઇનાન્સિયલ, આઇશર મોટર્સ, SBI અને અપોલો હોસ્પિટલ્સનો સમાવેશ થાય છે. જ્યારે ONGC, ટાઇટન, NTPC, પાવર ગ્રીડ અને ટેક મહિન્દ્રા જેવા શેર્સમાં નુકસાન જોવા મળ્યું હતું.

આઇટી અને મીડિયા સેક્ટરને બાદ કરતાં અન્ય તમામ ઇન્ડેક્સ લીલા નિશાનમાં રહ્યા. ખાસ કરીને PSU બેન્ક્સમાં 3.6 ટકા, નિફ્ટી બેન્કમાં 2 ટકા, પ્રાઇવેટ બેન્ક ઇન્ડેક્સ અને રિયલ્ટીમાં 1.6 ટકાનો જંગી ઉછાળો આવ્યો છે. મિડકેપ 1.3 ટકા અને સ્મોલકેપ 1.7 ટકા મજબૂત થયા છે.

નિફ્ટી અંગે નિષ્ણાતોનો શું મત છે?

LKP સિક્યોરિટીઝના ટેકનિકલ એનાલિસ્ટ વત્સલ ભુવા જણાવે છે કે નિફ્ટીએ તેના 23,150–23,200 ના મહત્વના સપોર્ટ ઝોન પાસે 'ઇન્વર્ટેડ હેમર કેન્ડલસ્ટિક' બનાવી છે, જે નીચલા સ્તરેથી ખરીદી આવવાનો સ્પષ્ટ સંકેત છે. આ દર્શાવે છે કે આગામી સેશનમાં ઇન્ડેક્સ 23,350–23,400 તરફ આગળ વધી શકે છે. જોકે, માર્કેટનો ટ્રેન્ડ હજુ થોડો નબળો છે કારણ કે ઇન્ડેક્સ તેના 20-દિવસ અને 50-દિવસના SMA થી નીચે છે. નવો ટ્રેન્ડ કન્ફર્મ કરવા નિફ્ટીએ 24,500 નું લેવલ પાર કરવું પડશે.

જીઓજિત ફાઇનાન્સિયલ સર્વિસિસના રિસર્ચ હેડ વિનોદ નાયરના મતે ઈરાન-ઈઝરાયેલ તણાવ ઘટવા અને ક્રૂડ ઓઈલ સસ્તું થવાને કારણે બજાર રિકવર થયું છે. છતાં વિદેશી રોકાણકારો (FII) ની વેચવાલી અને બોન્ડ યીલ્ડ વધવાની ચિંતા હજુ પણ છે. હવે બજારની નજર અમેરિકાના મોંઘવારીના આંકડા પર રહેશે. Q4FY26 ના પરિણામો સારા રહ્યા છે પરંતુ Q1FY27 માટે આઉટલૂક હજુ નબળું દેખાય છે.

SBI સિક્યોરિટીઝના એક્સપર્ટ સુદીપ શાહના મતે 23,380-23,400 નો ઝોન નિફ્ટી માટે મોટા રેઝિસ્ટન્સનું કામ કરશે. જો માર્કેટ 23,400 ની ઉપર ટકશે તો તે 23,550 સુધી જઈ શકે છે. નીચેની તરફ 23,100-23,070 મહત્વનો સપોર્ટ છે.