Moody's Ratings: આગામી વર્ષે રફ્તારથી વધશે ભારતની અર્થવ્યવસ્થા, GDP ગ્રોથ રેટ 6.5%થી વધુ રહેવાની ધારણા

GDP Growth Rate: આગામી નાણાકીય વર્ષ (2025-26)માં ભારતનો ગ્રોસ ડોમેસ્ટિક પ્રોડક્ટ (GDP) ગ્રોથ રેટ 6.5 ટકાથી વધુ રહેશે. મૂડીઝ રેટિંગ્સે આ અંદાજ લગાવ્યો છે. ચાલુ નાણાકીય વર્ષમાં ભારતીય અર્થતંત્ર 6.3 ટકાના દરે ગ્રોથ પામશે તેવી ધારણા છે. મૂડીઝે જણાવ્યું હતું કે સરકારી મૂડી ખર્ચમાં વધારો, ટેક્સ ઘટાડા અને વ્યાજ દરમાં ઘટાડો થવાથી વપરાશ વધશે અને આગામી નાણાકીય વર્ષમાં ભારતીય અર્થતંત્ર ઝડપી ગતિએ વિકાસ પામશે. બેન્કિંગ સેક્ટર માટે સ્થિર આઉટલુકનો અંદાજ લગાવતા, મૂડીઝે જણાવ્યું હતું કે આગામી નાણાકીય વર્ષમાં ભારતીય બેન્કો માટે કાર્યકારી વાતાવરણ અનુકૂળ રહેશે, પરંતુ તાજેતરના વર્ષોમાં નોંધપાત્ર સુધારા પછી તેમની સંપત્તિ ગુણવત્તામાં સામાન્ય ઘટાડો થશે.

આર્થિક ગ્રોથ ફરી તેજી આવવાની અપેક્ષા

અનસિક્યોર્ડ રિટેલ લોન, માઇક્રોફાઇનાન્સ લોન અને નાના વ્યવસાય લોન પર થોડું દબાણ રહેશે. બેન્કોની નફાકારકતા પર્યાપ્ત રહેશે, કારણ કે ચોખ્ખા વ્યાજ માર્જિન (NIM)માં ઘટાડો નજીવો રહેવાની શક્યતા છે. મૂડીઝે જણાવ્યું હતું કે 2024ના મધ્યમાં કામચલાઉ મંદી પછી ભારતનો આર્થિક વિકાસ ફરી વેગ પકડવાની અપેક્ષા છે. આ ગ્લોબલ લેવલે મુખ્ય અર્થતંત્રોમાં સૌથી ઝડપી દરોમાંનો એક હશે. મૂડીઝ રેટિંગ્સે જણાવ્યું હતું કે, “સરકારી મૂડી ખર્ચ, વપરાશ વધારવા માટે મધ્યમ આવક જૂથો માટે ટેક્સ ઘટાડા અને નાણાકીય સરળતા નાણાકીય વર્ષ 25-26માં ભારતનો વાસ્તવિક GDP ગ્રોથ રેટ 6.5 ટકાથી વધુ કરશે. ચાલુ નાણાકીય વર્ષમાં તે 6.3 ટકા રહેવાનો અંદાજ છે.

GDP ગ્રોથ રેટ 6.3-6.8 ટકા રહેવાનો અંદાજ

નાણા મંત્રાલયની આર્થિક સમીક્ષામાં આગામી નાણાકીય વર્ષ માટે GDP ગ્રોથ રેટ 6.3-6.8 ટકા રહેવાનો અંદાજ છે. સત્તાવાર અંદાજ મુજબ, ચાલુ નાણાકીય વર્ષમાં GDP ગ્રોથ રેટ 6.5 ટકા રહેશે. જુલાઈ-સપ્ટેમ્બર 2024 ક્વાર્ટરમાં દેશનો વાસ્તવિક GDP ગ્રોથ રેટ ઘટીને 5.6 ટકા થયો, જે આગામી ક્વાર્ટરમાં વધીને 6.2 ટકા થયો. મૂડીઝને અપેક્ષા છે કે ભારતનો સરેરાશ ફુગાવાનો દર ગયા વર્ષના 4.8 ટકાથી ઘટીને નાણાકીય વર્ષ 2025-26માં 4.5 ટકા થઈ જશે. ફુગાવાને નિયંત્રિત કરવા માટે રિઝર્વ બેંક ઓફ ઈન્ડિયા (RBI) એ મે, 2022 થી ફેબ્રુઆરી, 2023 દરમિયાન તેના પોલિસી રેટમાં 2.50 ટકાનો વધારો કર્યો હતો, જેના કારણે ઉધાર લેનારાઓ માટે વ્યાજ દરમાં ધીમે ધીમે વધારો થયો છે. ફેબ્રુઆરી 2025માં RBI એ તેનો પોલિસી રેટ 0.25 ટકા ઘટાડીને 6.25 ટકા કર્યો.

આ પણ વાંચો- Holika iloji love story: હોલિકાને પ્રેમની દેવી માનવામાં આવે છે, આજે પણ આ રાજ્યમાં યાદ કરવામાં આવે છે તેમની પ્રેમકથા