Share Market : તેજી સાથે ખૂલ્યું શેરબજાર, સેન્સેક્સ 350 પોઈન્ટ ઉછળ્યો, નિફ્ટી 23,200ને પાર

Share Market : વૈશ્વિક બજારોમાંથી મળી રહેલા પોઝિટિવ સંકેતોને પગલે આજે 9 જૂનના રોજ ભારતીય શેરબજારની શરૂઆત જોરદાર તેજી સાથે થઈ છે. શરૂઆતના ટ્રેડિંગમાં જ સ્થાનિક ઇન્ડેક્સ મજબૂતી સાથે ગ્રીન ઝોનમાં ટ્રેડ કરતા જોવા મળ્યા હતા. શરૂઆતી બેલ વાગતાની સાથે જ સેન્સેક્સ 356.67 પોઈન્ટ એટલે કે 0.49 ટકાના ઉછાળા સાથે 73,880.93 પર પહોંચી ગયો હતો. જ્યારે નિફ્ટી 50 ઇન્ડેક્સ પણ 114.10 પોઈન્ટ અથવા 0.49 ટકા વધીને 23,237.10 ની સપાટીએ કારોબાર કરતો જોવા મળ્યો હતો.

આજના ટ્રેડિંગ સેશનની શરૂઆતમાં બજારનો મૂડ ઘણો સારો દેખાઈ રહ્યો છે, જેમાં લગભગ 1930 શેરોમાં તેજીની ચાલ છે, જ્યારે 549 શેરો ઘટાડા સાથે લાલ નિશાનમાં અને 123 શેરો કોઈ પણ ફેરફાર વગર ટ્રેડ થઈ રહ્યા છે.

ગિફ્ટ નિફ્ટીના સંકેતો અને પ્રી-ઓપનિંગનો માહોલ

સવારે ગિફ્ટ નિફ્ટી તરફથી સંકેતો થોડા નબળા હતા. સવારે 7:38 વાગ્યાની આસપાસ ગિફ્ટ નિફ્ટી 23,137.00 ના સ્તર પર હતો, જે અગાઉના ક્લોઝિંગ કરતા લગભગ 36.50 પોઈન્ટ નીચે ટ્રેડ કરતો હતો અને ફ્લેટ ઓપનિંગ તરફ ઈશારો કરતો હતો. જોકે, પ્રી-ઓપનિંગ સેશનમાં જ ચિત્ર બદલાઈ ગયું હતું. પ્રી-ઓપનિંગમાં સેન્સેક્સ 506.65 પોઈન્ટ વધીને 74,030.91 પર અને નિફ્ટી 143.95 પોઈન્ટ વધીને 23,266.95 પર પહોંચી જતાં બજારે ઓપનિંગ સાથે જ રિકવરી પકડી લીધી હતી.

ગ્લોબલ માર્કેટ અને વોલેટિલિટી ફેક્ટર

અમેરિકન માર્કેટમાં ગત રાત્રે મિશ્ર વલણ જોવા મળ્યું હતું, પરંતુ સેમિકન્ડક્ટર શેરોની આગેવાનીમાં ત્યાં સારી ખરીદી નીકળી હતી. આ પોઝિટિવ સેન્ટિમેન્ટની અસર એશિયન બજારો પર પણ પડી અને મોટાભાગના એશિયન માર્કેટ પણ મજબૂતી સાથે ટ્રેડ થતા જોવા મળ્યા. સોમવારે ભારતીય બજારમાં મિડલ ઈસ્ટમાં વધતા તણાવ, ક્રૂડ ઓઈલની વધતી કિંમતો અને યુએસ ફેડરલ રિઝર્વના વ્યાજદર અંગેના કડક વલણને લીધે મોટો ઘટાડો આવ્યો હતો.

આજે રોકાણકારોની નજર વીકલી એક્સપાયરી પર પણ રહેશે. બજારમાં અસ્થિરતા માપતો ઇન્ડેક્સ એટલે કે ઇન્ડિયા વિક્સ 17ની ઉપર પહોંચી ગયો છે, જે દર્શાવે છે કે માર્કેટમાં ઉતાર-ચઢાવ હજુ ચાલુ રહેશે અને ઓપ્શન પ્રીમિયમ પણ ઉંચા રહેશે. જો બજાર આજના દિવસે ખરીદીની આ ગતિ જાળવી રાખશે, તો વોલેટિલિટી ઘટશે અને માર્કેટને આગળ વધવામાં વધુ સપોર્ટ મળશે.