ઇમરજન્સીના 50 વર્ષ: PM મોદીએ યાદ કર્યો ‘કાળો ઇતિહાસ’, સોશિયલ મીડિયા પર કરી આ અપીલ

ભારતના લોકતાંત્રિક ઇતિહાસના સૌથી કાળા અધ્યાય તરીકે ઓળખાતી ઇમરજન્સીના 50 વર્ષ આજે પૂર્ણ થયા છે. આ પ્રસંગે વડાપ્રધાન નરેન્દ્ર મોદીએ ‘ધ ઇમરજન્સી ડાયરીઝ’માં પોતાના અનુભવો શેર કર્યા છે અને દેશવાસીઓને સોશિયલ મીડિયા પર 1975-77ના દુ:ખદ સમયની યાદો શેર કરવા અપીલ કરી છે. તેમણે આ દિવસને ‘સંવિધાન હત્યા દિવસ’ તરીકે યાદ કર્યો.

RSSના યુવા પ્રચારક તરીકેની યાત્રા

મોદીએ જણાવ્યું કે, જ્યારે ઇમરજન્સી લાગુ કરવામાં આવી હતી ત્યારે તેઓ RSSના યુવા પ્રચારક હતા. આ સમયગાળાએ તેમને લોકતંત્રનું મહત્વ સમજાવ્યું અને વિવિધ રાજકીય વિચારધારાઓના લોકો સાથે કામ કરવાનો અનુભવ આપ્યો. તેમણે બ્લૂક્રાફ્ટ ડિજિટલ ફાઉન્ડેશન દ્વારા પ્રકાશિત ‘ધ ઇમરજન્સી ડાયરીઝ’ પુસ્તકનો ઉલ્લેખ કર્યો, જેની પ્રસ્તાવના ઇમરજન્સી વિરોધી આંદોલનના નેતા એચ.ડી. દેવેગૌડાએ લખી છે.

સોશિયલ મીડિયા પર અનુભવો શેર કરવાની અપીલ

PM મોદીએ X પ્લેટફોર્મ પર પોસ્ટમાં લખ્યું, “ઇમરજન્સીના તે કાળા દિવસોની યાદો ધરાવતા લોકો અને જેમના પરિવારોએ તે સમયે કષ્ટો ભોગવ્યા, તેઓ પોતાના અનુભવો સોશિયલ મીડિયા પર શેર કરે. આનાથી યુવા પેઢીમાં 1975-77ના શરમજનક સમય વિશે જાગૃતિ આવશે.”