PM મોદીની ઐતિહાસિક વિદેશ યાત્રા: 4 દિવસમાં 3 દેશોનો પ્રવાસ, જાણો ભારત માટે ઇથોપિયાની મુલાકાત કેમ છે અત્યંત મહત્વની?

India-Ethiopia relations: વડાપ્રધાન નરેન્દ્ર મોદી તેમની વ્યસ્ત કાર્યસૂચિ વચ્ચે 4 દિવસના વિદેશ પ્રવાસે જવા રવાના થયા છે, જ્યાં તેઓ 3 મહત્વના દેશોની મુલાકાત લેશે. આ પ્રવાસ દરમિયાન પીએમ મોદી જૉર્ડન, ઇથોપિયા અને ઓમાન જશે. આ તમામ મુલાકાતોમાં, ઇથોપિયાનો પ્રવાસ ભારત માટે વ્યૂહાત્મક અને કૂટનીતિક દૃષ્ટિએ ખૂબ જ ખાસ માનવામાં આવે છે. આ મુલાકાત પાછળનું મુખ્ય કારણ વર્ષ 2026માં ભારત દ્વારા યોજાનારી બ્રિક્સ શિખર સંમેલનની અધ્યક્ષતા છે. ઇથોપિયામાં ભારતના રાજદૂત અનિલ કુમાર રાયના જણાવ્યા મુજબ, આ મુલાકાત બંને દેશો વચ્ચેના દ્વિપક્ષીય સંબંધોને વધુ મજબૂત બનાવશે અને સંયુક્ત રાષ્ટ્ર સુધારા તેમજ બ્રિક્સ એજન્ડા જેવા આંતરરાષ્ટ્રીય મુદ્દાઓ પર સહયોગને નવી ઊંચાઈ આપશે.

પીએમ મોદીની આ આફ્રિકન દેશની મુલાકાત 16 થી 17 ડિસેમ્બર એટલે કે બે દિવસીય રહેશે. રાજદૂત અનિલ કુમાર રાયે જણાવ્યું હતું કે, "ભારત અને ઇથોપિયા બે મહાન સભ્યતાઓ ધરાવતા દેશો છે, જેમની વચ્ચે ખૂબ લાંબા સમયથી ગાઢ અને મૈત્રીપૂર્ણ સંબંધો રહ્યા છે." તેમણે ખાસ ભારપૂર્વક જણાવ્યું કે છેલ્લા 15 વર્ષમાં ઇથોપિયાની મુલાકાત લેનારા નરેન્દ્ર મોદી પ્રથમ ભારતીય વડાપ્રધાન હશે, જે આ ક્ષણને ઐતિહાસિક બનાવે છે. આ મુલાકાત દરમિયાન ચર્ચા માટે એક મોટો અને સમૃદ્ધ એજન્ડા તૈયાર છે, જે દ્વિપક્ષીય સહયોગને મજબૂત કરશે. આ ઉપરાંત, બંને દેશો બ્રિક્સ જૂથના સભ્ય હોવાથી આ ભાગીદારી વધુ મહત્વની બની જાય છે.

વર્ષ 2026માં ભારત બ્રિક્સનું અધ્યક્ષપદ સંભાળવા જઈ રહ્યું છે અને ઇથોપિયા આ સંગઠનનું એક મહત્વપૂર્ણ સભ્ય છે. આથી, પ્રાદેશિક અને આંતરરાષ્ટ્રીય સ્તરના મુદ્દાઓ પર બંને દેશો વચ્ચે સહયોગ વધારવા પર ભાર મૂકવામાં આવશે. ઉલ્લેખનીય છે કે, ભારત બ્રિક્સના સંસ્થાપક સભ્યો પૈકીનું એક છે. આ જૂથને સૌપ્રથમ 2006માં ન્યૂયોર્કમાં સંયુક્ત રાષ્ટ્ર મહાસભા દરમિયાન ઔપચારિક સ્વરૂપ મળ્યું હતું. તેનું પ્રથમ શિખર સંમેલન 2009માં રશિયામાં યોજાયું હતું. વર્ષ 2010માં દક્ષિણ આફ્રિકા જોડાતાં આ જૂથ 'બ્રિક્સ' તરીકે ઓળખાયું. તાજેતરમાં, ઓગસ્ટ 2023માં મળેલા આમંત્રણ બાદ જાન્યુઆરી 2024માં ઇથોપિયા, મિસર, ઈરાન અને સંયુક્ત આરબ અમીરાત (UAE) પણ સત્તાવાર રીતે બ્રિક્સના પૂર્ણ સભ્ય બન્યા હતા.

ભારતના વિદેશ મંત્રાલયના જણાવ્યા અનુસાર, વડાપ્રધાન મોદીની આ પ્રથમ ઇથોપિયા યાત્રા છે. આ દરમિયાન તેઓ ઇથોપિયાના વડાપ્રધાન અલી સાથે મુલાકાત કરશે અને ભારત-ઇથોપિયા સંબંધોના તમામ પાસાઓ પર વિસ્તૃત ચર્ચા કરશે. મંત્રાલયે એક નિવેદનમાં કહ્યું, "ગ્લોબલ સાઉથમાં ભાગીદાર તરીકે, આ મુલાકાત ગાઢ મિત્રતા અને દ્વિપક્ષીય સહયોગને આગળ વધારવા માટે બંને દેશોની સહિયારી પ્રતિબદ્ધતાની પુષ્ટિ કરશે."

આ પણ વાંચો-  Parliament Winter Session: સંસદ સત્ર અધવચ્ચે છોડી રાહુલ ગાંધી લંડન રવાના, જર્મનીનો પણ પ્રવાસ કરશે