Apple 'Surprise and Shine' Event: આ દિવસે લોન્ચ થશે iPhone 18 Proથી લઈને ફોલ્ડેબલ iPhone Ultra, જાણો ભારતમાં કેવી રીતે જોશો લાઈવ?

Apple 'Surprise and Shine' Event: જો તમે પણ Appleના નવા ડિવાઇસની આતુરતાથી રાહ જોઈ રહ્યા છો, તો તમારા માટે ખુશખબર છે. ક્યુપરટિનોની દિગ્ગજ ટેક કંપની Apple એ પોતાની આગામી મોટી પ્રોડક્ટ લોન્ચ ઇવેન્ટની સત્તાવાર જાહેરાત કરી દીધી છે. આ શાનદાર ઇવેન્ટનું નામ "Surprise and Shine" રાખવામાં આવ્યું છે.

આ મેગા ઇવેન્ટમાં કંપની તેના બહુચર્ચિત iPhone 18 Pro, iPhone 18 Pro Max અને પોતાના અત્યાર સુધીના સૌથી પહેલા ફોલ્ડેબલ સ્માર્ટફોન પરથી પડદો ઉઠાવશે. ચર્ચા છે કે આ ફોલ્ડેબલ ફોનને 'iPhone Ultra' નામ આપવામાં આવી શકે છે. આ ઉપરાંત નવી Apple Watch અને ભવિષ્યના AirPods પણ જોવા મળી શકે છે. જો તમે આ ઇવેન્ટ લાઈવ જોવા માંગો છો, તો અહીં તમામ જરૂરી માહિતી આપવામાં આવી છે.

ક્યારે અને ક્યાં જોઈ શકાશે Apple ની લાઈવ ઇવેન્ટ?

Apple નો આ કીનોટ 9 સપ્ટેમ્બરના રોજ ક્યુપરટિનોમાં આવેલા Apple Park ના ઐતિહાસિક 'સ્ટીવ જોબ્સ થિયેટર' માં યોજાશે.પેસિફિક ટાઇમ મુજબ આ ઇવેન્ટ સવારે 10:00 વાગ્યે શરૂ થશે, જ્યારે ભારતીય સમય અનુસાર રાત્રે 10:30 વાગ્યે તેનું લાઈવ પ્રસારણ થશે. ભારતીય યુઝર્સ આ ઇવેન્ટને Appleની સત્તાવાર YouTube ચેનલ, Apple TV એપ અને Apple Events ની વેબસાઇટ પર એકદમ ફ્રીમાં લાઈવ જોઈ શકશે. આ માટે કોઈ રજીસ્ટ્રેશનની જરૂર રહેશે નહીં.

નોંધનીય છે કે, કંપનીના નવા CEO જોન ટર્નસના નેતૃત્વમાં આ પહેલું મોટું iPhone લોન્ચ પ્રેઝન્ટેશન હશે.

નવા iPhone માં શું હશે ખાસ?

આ ઇવેન્ટમાં સૌની નજર સિરીઝના મુખ્ય ફોન iPhone 18 Pro અને iPhone 18 Pro Max પર ટકેલી હશે.ટેક જગતની અફવાઓ મુજબ, આ બંને ફોનમાં Apple ની નવી 2nm પ્રોસેસ પર બનેલી અત્યંત પાવરફુલ 'A20 Pro' ચિપસેટ જોવા મળશે. ફોનની ડિઝાઇન જૂના મોડલ જેવી જ હોઈ શકે છે, પરંતુ મોટા કેમેરા કટઆઉટ, શાનદાર કેમેરા ક્વોલિટી અને નવા કલર ઓપ્શન યુઝર્સને નવો અનુભવ કરાવશે. આ સિવાય સૌથી મોટું સરપ્રાઇઝ કંપનીનો પહેલો ફોલ્ડેબલ ફોન 'iPhone Ultra' હોઈ શકે છે. આ ડિવાઇસ બુક-સ્ટાઇલ ફોલ્ડિંગ ડિઝાઇન સાથે આવશે, જેમાં અંદર એક મોટી સ્ક્રીન અને બહાર નાની કવર સ્ક્રીન હશે. ફોન ગરમ ન થાય અને શાનદાર પરફોર્મન્સ આપે તે માટે અંદરની થર્મલ ડિઝાઇન સંપૂર્ણપણે નવી બનાવવામાં આવી છે.