મુકેશ અંબાણીની દરિયાદિલી...ICT મુંબઈને 151 કરોડનું ડોનેશન, ગુરુ દક્ષિણા તરીકે ખાસ ઉપહાર

રિલાયન્સ ઇન્ડસ્ટ્રીઝના ચેરમેન મુકેશ અંબાણીએ ફરી એકવાર પોતાની દરિયાદિલીનું ઉદાહરણ આપ્યું છે. તેમણે મુંબઈ સ્થિત ઇન્સ્ટિટ્યૂટ ઑફ કેમિકલ ટેક્નોલોજી (ICT)ને 151 કરોડ રૂપિયાનું બિનશરતી ડોનેશન આપ્યું છે. આ ડોનેશનને મુકેશ અંબાણીએ પોતાના ગુરુ પ્રોફેસર એમ.એમ. શર્માને ‘ગુરુ દક્ષિણા’ તરીકે અર્પણ કર્યું છે. આ ખાસ પ્રસંગે તેમણે ICTમાં પ્રોફેસર શર્માની બાયોગ્રાફી ‘ડિવાઇન સાયન્ટિસ્ટ’ના લોન્ચિંગ ઇવેન્ટમાં ત્રણ કલાકથી વધુ સમય વિતાવ્યો હતો.

ગુરુ-શિષ્યનો અનોખો બોન્ડ

મુકેશ અંબાણીએ 1970ના દાયકામાં ICT (તે સમયે યુનિવર્સિટી ડિપાર્ટમેન્ટ ઑફ કેમિકલ ટેક્નોલોજી - UDCT)માંથી ગ્રેજ્યુએશન પૂર્ણ કર્યું હતું. આ ઇવેન્ટ દરમિયાન તેમણે પોતાના વિદ્યાર્થી જીવનની યાદોને તાજી કરી. તેમણે જણાવ્યું કે, “પ્રોફેસર શર્માનું પ્રથમ લેક્ચર મારા માટે પ્રેરણાદાયી હતું. તેમણે મને શીખવ્યું કે વિજ્ઞાન અને ટેક્નોલોજીનો ઉપયોગ દેશના ઉદ્યોગોને આગળ વધારવા માટે કરી શકાય છે.” અંબાણીએ પ્રોફેસર શર્માને ‘રાષ્ટ્ર ગુરુ - ભારતના ગુરુ’ તરીકે સંબોધ્યા અને તેમના યોગદાનને બિરદાવ્યું.

પ્રોફેસર શર્મા: ભારતીય ઇન્ડસ્ટ્રીના સપના જોનાર

મુકેશ અંબાણીએ પોતાના પિતા ધીરૂભાઈ અંબાણી અને પ્રોફેસર શર્મા વચ્ચે સરખામણી કરતા જણાવ્યું કે બંનેએ ભારતીય ઉદ્યોગોને વૈશ્વિક સ્તરે લઈ જવાનું સપનું જોયું હતું. પ્રોફેસર શર્માએ ભારતના આર્થિક સુધારાઓમાં મહત્વની ભૂમિકા ભજવી હતી. તેમણે નીતિ નિર્માતાઓને સમજાવ્યું કે લાઇસન્સ-પરમિટ રાજની વ્યવસ્થાને ખતમ કરીને ભારતીય ઉદ્યોગોને મોટા પાયે મેન્યુફેક્ચરિંગ કરવાની તક આપવી જોઈએ. આનાથી દેશની આયાત પર નિર્ભરતા ઘટશે અને વૈશ્વિક સ્પર્ધામાં ભારત મજબૂત રહેશે.

151 કરોડનું ડોનેશન: ગુરુના આદેશનું પાલન

અંબાણીએ જણાવ્યું કે આ 151 કરોડ રૂપિયાનું ડોનેશન પ્રોફેસર શર્માના આદેશ અનુસાર આપવામાં આવ્યું છે. તેમણે હળવા અંદાજમાં કહ્યું, “જ્યારે ગુરુજી કંઈ કહે છે, ત્યારે અમે ફક્ત સાંભળીએ છીએ, વિચારતા નથી. પ્રોફેસર શર્માએ મને ICT માટે કંઈક મોટું કરવાનું કહ્યું હતું, અને મને આ ડોનેશનની જાહેરાત કરતાં ખૂબ જ આનંદ થાય છે.” આ ડોનેશન બિનશરતી છે, જેનો ઉપયોગ ICTના વિકાસ અને શૈક્ષણિક પ્રવૃત્તિઓ માટે થશે.