ચેસમાં આર પ્રજ્ઞાનંદાનો ડંકો: ફૈબિયાનો કારુઆનાને હરાવી ગ્રાન્ડ ચેસ ટૂર જીતનાર બન્યો પ્રથમ ભારતીય, રચ્યો ઈતિહાસ

ભારતના યુવા ચેસ ગ્રાન્ડમાસ્ટર આર પ્રજ્ઞાનંદાએ આંતરરાષ્ટ્રીય સ્તરે ફરી એકવાર દેશનું નામ રોશન કર્યું છે. સેન્ટ લુઇસમાં રમાયેલી અત્યંત રોમાંચક ફાઇનલ મેચમાં પ્રજ્ઞાનંદાએ ઈતિહાસ રચતા 'ગ્રાન્ડ ચેસ ટૂર' નું ટાઇટલ પોતાના નામે કરી લીધું છે. આ શાનદાર જીત સાથે જ તે આ પ્રતિષ્ઠિત ચેસ ટુર્નામેન્ટ જીતનાર ભારતનો સૌપ્રથમ ખેલાડી બની ગયો છે.

ચેન્નઈના રહેવાસી આ યુવા ખેલાડીએ ફાઇનલ મુકાબલામાં અમેરિકાના દિગ્ગજ ખેલાડી ફૈબિયાનો કારુઆનાને 15-13 ના સ્કોરથી માત આપી છે. ખાસ વાત એ છે કે, આ ઐતિહાસિક જીત સાથે પ્રજ્ઞાનંદાએ પોતાની પ્રથમ ટ્રોફી અને અંદાજે 2 કરોડ રૂપિયાની મોટી ઈનામી રકમ જીતી લીધી છે. નોંધનીય છે કે, થોડા સમય પહેલા જ તેણે સેન્ટ લુઇસ રેપિડ એન્ડ બ્લિટ્ઝનું ટાઇટલ પણ જીત્યું હતું.

છેલ્લા દિવસે પ્રજ્ઞાનંદાની શાનદાર વાપસી

આ ફાઇનલ મેચ કોઈ ફિલ્મી સ્ટોરીથી કમ નહોતી. ટુર્નામેન્ટના અંતિમ દિવસે શરૂઆતમાં ફૈબિયાનો કારુઆના 6 પોઈન્ટથી આગળ ચાલી રહ્યો હતો. પ્રજ્ઞાનંદા માટે આટલા પાછળ રહ્યા બાદ વાપસી કરવી એક મોટો પડકાર હતો. પરંતુ ભારતીય ખેલાડીએ હાર ન માની અને શાનદાર રમત બતાવતા બંને રેપિડ મેચ જીતી લઈને સરસાઈ મેળવી લીધી.

ત્યારબાદ બ્લિટ્ઝ સેક્શનમાં પણ તેણે પોતાનું વર્ચસ્વ જાળવી રાખ્યું. બંને ખેલાડીઓ વચ્ચેની બ્લિટ્ઝ મેચ બરાબરી પર પૂરી થઈ, અને આખરે પ્રજ્ઞાનંદાએ 15-13 ના કુલ સ્કોર સાથે આસાનીથી ચેમ્પિયનશિપ પોતાના નામે કરી લીધી.

મેચનો રોમાંચક ઉતાર-ચઢાવ

પહેલી ક્લાસિકલ ગેમ: શરૂઆતની પહેલી ક્લાસિકલ ગેમમાં કારુઆના સંપૂર્ણપણે હાવી રહ્યો હતો અને તેણે 6-0 થી જીત મેળવી હતી.