Canada Indian Tensions: ભારતથી કેનેડા ભણવા જતા વિદ્યાર્થીઓની સંખ્યામાં મોટો ઘટાડો, વિવાદ બન્યું કારણ

Canada Indian Tensions: ખાલિસ્તાની આતંકવાદી હરદીપ સિંહ નિજ્જરની હત્યાને લઈને ભારત અને કેનેડા વચ્ચે વિવાદ ચાલી રહ્યો છે. આવી સ્થિતિમાં કેનેડામાં રહેતા લોકો અને ત્યાં ભણતા વિદ્યાર્થીઓ ખૂબ જ ચિંતિત છે. આ દરમિયાન કેનેડાના ઉચ્ચ અધિકારી ઈમિગ્રેશન મિનિસ્ટર માર્ક મિલર દ્વારા એક રિપોર્ટ બહાર આવ્યો છે. કેનેડાના એક અધિકારીએ ન્યૂઝ એજન્સી રોઈટર્સને જણાવ્યું કે બંને દેશો વચ્ચેના રાજદ્વારી વિવાદને કારણે વર્ષ 2023માં કેનેડા દ્વારા ભારતીય વિદ્યાર્થીઓને આપવામાં આવેલી સ્ટડી પરમિટની સંખ્યામાં મોટો ઘટાડો થયો છે. તેમનું માનવું છે કે ભારતીયો માટે સ્ટડી પરમિટની સંખ્યામાં ટૂંક સમયમાં વધારો થવાની શક્યતા નથી.

સત્તાવાર માહિતી અનુસાર, ગયા વર્ષના ચોથા ક્વાર્ટરમાં ભારતીયોને આપવામાં આવેલી સ્ટડી પરમિટમાં અગાઉના ક્વાર્ટરની સરખામણીમાં 86 ટકાનો ઘટાડો થયો છે. આ સંખ્યા 108,940 થી ઘટીને 14,910 થઈ ગઈ છે.

ભારત માંગી રહ્યું છે પુરતા પુરાવા

ખાલિસ્તાની આતંકવાદી હરદીપ સિંહ નિજ્જરની હત્યાના રાજદ્વારી વિવાદને કારણે ઓછા ભારતીય વિદ્યાર્થીઓએ કેનેડામાં આવીને અભ્યાસ કરવા માટે અરજી કરી હતી. જૂનમાં, કેનેડાના વડા પ્રધાન જસ્ટિન ટ્રુડોએ કહ્યું હતું કે કેનેડિયન સરકાર પાસે પુરાવા છે કે નિજ્જરની બ્રિટિશ કોલંબિયામાં હત્યા ભારત સરકારના એજન્ટો દ્વારા કરવામાં આવી હતી.