Petrol-Diesel Price Forecast: મોંઘવારીના માર વચ્ચે સામાન્ય જનતા માટે એક રાહતના સમાચાર સામે આવ્યા છે. જો તમે વાહનચાલક હોવ અને પેટ્રોલ-ડીઝલના આસમાને પહોંચેલા ભાવથી પરેશાન હોવ, તો આવનારો સમય તમારા ખિસ્સા પરનો બોજ હળવો કરી શકે છે. સ્ટેટ બેંક ઓફ ઈન્ડિયા રિસર્ચના તાજેતરના વિશ્લેષણ મુજબ, વર્ષ 2026માં આંતરરાષ્ટ્રીય બજારમાં કાચા તેલના ભાવમાં મોટો ઘટાડો થવાની પ્રબળ શક્યતાઓ છે.
Petrol-Diesel Price Forecast: વાહનચાલકો માટે મોટા સમાચાર, 2026માં પેટ્રોલ-ડીઝલના ભાવમાં થશે ભારે ઘટાડો? જાણો શું કહે છે SBIનો રિપોર્ટ
શું તમે પણ પેટ્રોલ-ડીઝલના ભાવ ઘટવાની રાહ જોઈ રહ્યા છો? SBI રિસર્ચના નવા રિપોર્ટ મુજબ 2026માં ક્રૂડ ઓઈલના ભાવ તળિયે બેસી શકે છે! જાણો ક્યારે અને કેટલો થશે ફાયદો.
MoneyControl Newsઅપડેટેડ Jan 06, 2026 પર 2:16 PM
જૂન 2026 સુધીમાં મોટી રાહતના સંકેત
SBI રિસર્ચના રિપોર્ટમાં કરવામાં આવેલા દાવા મુજબ, જૂન 2026 સુધીમાં આંતરરાષ્ટ્રીય સ્તરે ક્રૂડ ઓઈલની કિંમત ગગડીને 50 ડોલર પ્રતિ બેરલ સુધી પહોંચી શકે છે. જો ખરેખર આવું થાય, તો તેની સીધી અસર ભારતીય બજારો પર પડશે અને પેટ્રોલ-ડીઝલના ભાવમાં નોંધપાત્ર ઘટાડો જોવા મળી શકે છે.
હાલ શું છે ક્રૂડ ઓઈલની સ્થિતિ?
અત્યારની વાત કરીએ તો, આંતરરાષ્ટ્રીય બજારમાં ઉતાર-ચઢાવ ચાલુ છે. હાલમાં 'બ્રેન્ટ ક્રૂડ' સામાન્ય વધારા સાથે 61.76 ડોલર પ્રતિ બેરલ પર ટ્રેડ કરી રહ્યું છે, જ્યારે 'WTI ક્રૂડ' 58.29 ડોલરની આસપાસ છે. જોકે, નિષ્ણાતોનું માનવું છે કે આગામી સમયમાં આ ભાવ નીચે જવાની પૂરેપૂરી શક્યતા છે.
ભારત માટે કેમ મહત્વના છે આ સમાચાર?
ભારત પોતાની જરૂરિયાતનું મોટું તેલ બહારથી આયાત કરે છે. SBI રિસર્ચ ટીમના જણાવ્યા મુજબ, બ્રેન્ટ ક્રૂડ અને ભારતીય બાસ્કેટ વચ્ચે ખૂબ મજબૂત સંબંધ છે. સરળ ભાષામાં કહીએ તો, જ્યારે પણ આંતરરાષ્ટ્રીય બજારમાં ભાવ ઘટે છે, ત્યારે ભારત માટે તેલની આયાત સસ્તી બને છે.
આ ઘટાડો માત્ર ઈંધણ પૂરતો મર્યાદિત નહીં રહે. જો ડીઝલ સસ્તું થાય તો ટ્રાન્સપોર્ટેશન ખર્ચ ઘટે છે, જેના કારણે શાકભાજીથી લઈને જીવનજરૂરિયાતની અન્ય ચીજવસ્તુઓના ભાવમાં પણ ઘટાડો થઈ શકે છે. આમ, આર્થિક વિકાસને પણ નવી ગતિ મળશે.
ટેકનિકલ ચાર્ટ શું કહે છે?
માત્ર અનુમાન જ નહીં, પરંતુ ટેકનિકલ એનાલિસિસ પણ ભાવ ઘટાડા તરફ ઈશારો કરી રહ્યું છે. ભારતીય ક્રૂડ ઓઈલની કિંમતો હાલમાં તેની 50 અને 200 દિવસની 'મૂવિંગ એવરેજ' થી નીચે ચાલી રહી છે. શેરબજાર અને કોમોડિટી માર્કેટની ભાષામાં આ એક સંકેત છે કે ભવિષ્યમાં ભાવ હજુ પણ નીચે જઈ શકે છે.
લાંબા સમયથી ભાવ સ્થિર, હવે ઘટાડાની આશા
તમને યાદ હશે કે છેલ્લે માર્ચ 2024માં સરકારે પેટ્રોલ અને ડીઝલના ભાવમાં પ્રતિ લિટર 2 રૂપિયાનો ઘટાડો કર્યો હતો. ત્યારથી લઈને અત્યાર સુધી ભાવમાં કોઈ મોટો ફેરફાર થયો નથી.
દિલ્હીમાં ભાવ: પેટ્રોલ રુપિયા 94.77 અને ડીઝલ રુપિયા 87.67 પ્રતિ લિટર.
ગુજરાતમાં ભાવ: પેટ્રોલ અંદાજે રુપિયા 94.63 થી રુપિયા 95 અને ડીઝલ રુપિયા 90.30 થી રુપિયા 90.67 પ્રતિ લિટર.
ભાવ ઘટવાનું મુખ્ય કારણ શું હશે?
આ ઘટાડા પાછળનું સૌથી મોટું કારણ તેલનો વધતો જતો સપ્લાય છે. અમેરિકી ઉર્જા માહિતી વહીવટીતંત્રના ડેટા અનુસાર, વર્ષ 2026ના પ્રથમ ક્વાર્ટરમાં વૈશ્વિક સ્તરે તેલના ભંડારમાં વધારો થશે. બજારમાં જ્યારે માલ (તેલ) વધારે હોય અને સામે માંગ ઓછી કે સ્થિર હોય, ત્યારે ભાવ ઘટવા સ્વાભાવિક છે.
જો બ્રેન્ટ ક્રૂડ 50 થી 55 ડોલરની રેન્જમાં આવી જાય, તો સરકાર અને ઓઈલ કંપનીઓ પાસે સામાન્ય જનતાને મોટી રાહત આપવાનો અવકાશ રહેશે. આનાથી સામાન્ય માણસના ઘરનું બજેટ સુધરશે અને મોંઘવારીમાં મોટી રાહત મળશે.
પહેલા મનીકંટ્રોલ ગુજરાતી પર ગુજરાતીમાં સ્ટોક માર્કેટ, Stock Tips, સમાચાર, પર્સનલ ફાઇનાન્સ અને બિઝનેસ સંબંધિત સમાચાર વાંચો. દૈનિક બજાર અપડેટ્સ માટે Moneycontrol App ડાઉનલોડ કરો.