Budget 2026: શું જૂની ટેક્સ સિસ્ટમ હવે ઈતિહાસ બની જશે? નોકરિયાતો માટે આવી શકે છે મોટા સમાચાર!

Budget 2026: દેશના સામાન્ય નાગરિકો અને ખાસ કરીને પગારદાર વર્ગની નજર હવે આગામી બજેટ પર ટકેલી છે. 1 ફેબ્રુઆરી 2026ના રોજ કેન્દ્રીય બજેટ રજૂ થવા જઈ રહ્યું છે. આ બજેટ પહેલાં કરદાતાઓના મનમાં એક જ મોટો સવાલ ઘૂમરાઈ રહ્યો છે - શું સરકાર હવે 'જૂની કર વ્યવસ્થા'ને કાયમ માટે તાળું મારી દેશે?

આ ચિંતા પાછળનું એક મોટું કારણ એ છે કે હાલમાં લગભગ 95 ટકા કરદાતાઓ 'નવી કર વ્યવસ્થા' અપનાવી ચૂક્યા છે. તો ચાલો, સમજીએ કે આ બજેટમાં તમારી કમાણી અને ટેક્સ પર શું અસર થઈ શકે છે.

શું જૂની ટેક્સ સિસ્ટમ બંધ થઈ જશે?

સરકારે અગાઉ જ નવી ટેક્સ સિસ્ટમને 'ડિફોલ્ટ વિકલ્પ' બનાવી દીધી છે. એટલે કે જો તમે કોઈ પસંદગી ન કરો, તો આપોઆપ નવી સિસ્ટમ લાગુ થઈ જાય છે. સરકારનું વલણ પણ સ્પષ્ટ છે કે તેઓ લોકોને નવી વ્યવસ્થા તરફ વાળવા માંગે છે.

જોકે, બજારના નિષ્ણાતો અને ટેક્સ એક્સપર્ટ્સનું માનવું છે કે, આ બજેટમાં જૂની કર વ્યવસ્થાને સંપૂર્ણપણે નાબૂદ કરવામાં આવે તેવી શક્યતા ઓછી છે. હા, એવું બની શકે કે સરકાર તેનું મહત્ત્વ ઘટાડી દે. સરકારનો ઈરાદો એક એવી ટેક્સ સિસ્ટમ બનાવવાનો છે જે એકદમ સરળ હોય, જેમાં બહુ બધી ગણતરીઓ કે છૂટછાટ (Exemptions) ન હોય અને કોઈ વિવાદ ઊભો ન થાય. એટલે ભવિષ્યમાં જૂની સિસ્ટમ ધીમે-ધીમે ગાયબ થઈ શકે છે, પણ હાલ પૂરતી તે ચાલુ રહેવાની ધારણા છે.

પગારદાર વર્ગ માટે મોટા સમાચાર: સ્ટાન્ડર્ડ ડિડક્શનમાં વધારો?

જો તમે નોકરિયાત છો, તો તમારા માટે સારા સમાચાર આવી શકે છે. જે લોકો હજુ પણ જૂની સિસ્ટમમાં છે, તેમને નવી કર વ્યવસ્થા તરફ આકર્ષવા માટે સરકાર એક મોટું પાસું ફેંકી શકે છે. ચર્ચા એવી છે કે સરકાર સ્ટાન્ડર્ડ ડિડક્શન (Standard Deduction) ની મર્યાદા વધારી શકે છે.