Budget Session 2026: રાષ્ટ્રપતિ મુર્મુના સંબોધન સાથે બજેટ સત્રનો પ્રારંભ, ‘ઓપરેશન સિંદૂર’ અને રોજગાર ગેરંટી પર મોટી જાહેરાત

Budget Session 2026: સંસદનું બજેટ સત્ર (Budget Session 2026) આજથી શરૂ થઈ ગયું છે. આ સત્રની શરૂઆત રાષ્ટ્રપતિ દ્રૌપદી મુર્મુના વિશેષ સંબોધન સાથે થઈ હતી. તેમણે લોકસભા અને રાજ્યસભાના તમામ સાંસદોને એકસાથે સંબોધિત કર્યા હતા. હવે સૌની નજર 1 ફેબ્રુઆરી પર છે, જ્યારે દેશનું કેન્દ્રીય બજેટ રજૂ કરવામાં આવશે. જોકે, સત્રની શરૂઆત પહેલાં જ વિપક્ષે સરકાર સામે બાંયો ચઢાવી છે અને અનેક મુદ્દે ચર્ચાની માંગ કરી છે.

વિપક્ષનો વિરોધ અને માંગણીઓ

બજેટ સત્ર શરૂ થાય તે પહેલાં એક સર્વપક્ષીય બેઠક યોજાઈ હતી. આ બેઠકમાં વિપક્ષી નેતાઓએ 'વિકસિત ભારત-જી રામ જી અધિનિયમ' અને મતદાર યાદીની તપાસ જેવા સંવેદનશીલ મુદ્દાઓ પર સંસદમાં ચર્ચા કરવાની માંગ કરી હતી. જોકે, પ્રાપ્ત માહિતી મુજબ સરકારે હાલમાં આ માંગણીઓ સ્વીકારી નથી, જેના કારણે સત્ર તોફાની બનવાની શક્યતા છે.

મહિલાઓની પ્રગતિ અને નારી શક્તિ

રાષ્ટ્રપતિ મુર્મુએ પોતાના ભાષણમાં સરકારની સિદ્ધિઓ ગણાવતા કહ્યું હતું કે, સરકારની પ્રોગ્રેસિવ નીતિઓને કારણે દેશની મહિલાઓએ દરેક ક્ષેત્રમાં હરણફાળ ભરી છે. તેમણે એક મોટી સિદ્ધિનો ઉલ્લેખ કરતા કહ્યું કે, રાષ્ટ્રીય રક્ષા એકાદમી (NDA)માંથી મહિલા કેડેટ્સની પ્રથમ બેચ પાસ આઉટ થઈ છે. આ ઘટના દેશના વિકાસમાં 'નારી શક્તિ' ના મહત્વને સાબિત કરે છે.

2 લાખ સ્ટાર્ટઅપ અને આર્થિક બદલાવ

દેશની આર્થિક પ્રગતિ વિશે વાત કરતા રાષ્ટ્રપતિએ જણાવ્યું કે, આજે ભારતમાં 2 લાખ જેટલા સ્ટાર્ટઅપ રજીસ્ટર્ડ છે. મુદ્રા યોજનાને કારણે સ્વરોજગારમાં મોટો વધારો થયો છે. તેમણે એમ પણ કહ્યું કે વૈશ્વિક સ્તરે સમીકરણો બદલાઈ રહ્યા છે અને ભારત એક મજબૂત વિદેશ નીતિ સાથે આગળ વધી રહ્યું છે. ભારત આજે દુનિયામાં એક સેતુની ભૂમિકા ભજવી રહ્યું છે.