Budget: સ્ટોક અને મ્યુચ્યુઅલ ફંડ ઇન્વેસ્ટર્સ માટે સરકારની મોટી ભેટ, ડિવિડન્ડ આવક પર TDS લિમિટ વધારવાની જાહેરાત

Budget 2025: નાણામંત્રી નિર્મલા સીતારમણે આજે સંસદમાં નાણાકીય વર્ષ 2025-26 માટેનું બજેટ રજૂ કર્યું. આ બજેટમાં સરકારે દેશના તમામ વર્ગોનું ખાસ ધ્યાન રાખવાનો પ્રયાસ કર્યો. નાણામંત્રીએ આજે ​​મધ્યમ વર્ગ માટે મોટી રાહતની જાહેરાત કરી અને નવી ટેક્સ પ્રણાલી હેઠળ 12 લાખ રૂપિયા સુધીની આવકને કરમુક્ત કરવાની જાહેરાત કરી. જ્યારે નોકરી કરતા લોકો માટે 12.75 લાખ રૂપિયા સુધીની આવક પર કોઈ ટેક્સ નહીં લાગે. આ સાથે, સરકારે શેર અને મ્યુચ્યુઅલ ફંડ ઇન્વેસ્ટર્સ દ્વારા મળતા ડિવિડન્ડ પર લાદવામાં આવતી TDS ની લિમિટ વધારવાની પણ જાહેરાત કરી.

10,000 રૂપિયા સુધીના ડિવિડન્ડ આવક પર TDS કાપવામાં આવશે નહીં

નાણામંત્રીએ ડિવિડન્ડ આવક પર કાપવામાં આવતા TDSની લિમિટ રુપિયા 5,000થી વધારીને રુપિયા 10,000 કરવાની જાહેરાત કરી. આનો અર્થ એ થયો કે ઇન્વેસ્ટર્સને વર્ષમાં મળેલા 10,000 રૂપિયા સુધીના ડિવિડન્ડ પર 1 રૂપિયાનો પણ TDS વસૂલવામાં આવશે નહીં. જોકે 10,000 રૂપિયાથી વધુના ડિવિડન્ડ પર 10 ટકા TDS કાપવામાં આવશે. આ નવો નિયમ 1 એપ્રિલ, 2025થી અમલમાં આવશે. તમને જણાવી દઈએ કે 5000 રૂપિયાથી વધુના ડિવિડન્ડના કિસ્સામાં, કંપની 10 ટકા TDS કાપીને ઇન્વેસ્ટર્સના ખાતામાં પૈસા ટ્રાન્સફર કરે છે.

ડિવિડન્ડ પર કાપવામાં આવતા TDSનું ગણિત ઉદાહરણ સાથે સમજો

ઉદાહરણ તરીકે, રમેશ પાસે ABC કંપનીના 1000 શેર છે. કંપનીએ દરેક શેર પર 10 રૂપિયાના ડિવિડન્ડની જાહેરાત કરી છે. આ મુજબ, રમેશને કુલ 10,000 રૂપિયા ડિવિડન્ડ તરીકે મળશે. નવા નિયમો હેઠળ, રમેશને મળતા ડિવિડન્ડ પર કોઈ TDS કાપવામાં આવશે નહીં. જ્યારે વર્તમાન નિયમો હેઠળ 10,000 રૂપિયાના ડિવિડન્ડ પર 10 ટકા (1,000 રૂપિયા) TDS કાપ્યા પછી, રમેશના બેન્ક ખાતામાં ફક્ત 9000 રૂપિયા જ આવશે. આનો સીધો અર્થ એ છે કે નવી સિસ્ટમ હેઠળ ઇન્વેસ્ટર્સ ઘણી બચત કરશે.

આ પણ વાંચો - ગુજરાતમાં મોટા સ્તરે IAS અધિકારીઓની બદલીઓ, બંછાનિધિ અમદાવાદના નવા કમિશનર, અનિલ ધામેલિયા વડોદરાના કલેક્ટર બન્યા, જુઓ યાદી