Share Market on Sunday: રવિવારે પણ ધમધમશે શેરબજાર? બજેટ 2026ને કારણે રચાશે ઈતિહાસ!

Share Market on Sunday: સામાન્ય રીતે શનિવાર અને રવિવાર એટલે શેરબજારના રોકાણકારો માટે રજાના દિવસો. પરંતુ હવે આ પરંપરા તૂટી શકે છે. ભારતીય શેરબજારના ઈતિહાસમાં પ્રથમ વખત, નેશનલ સ્ટોક એક્સચેન્જ (NSE) રવિવારના દિવસે પણ બજાર ખુલ્લું રાખવાની વિચારણા કરી રહ્યું છે. આ અનોખા વિચાર પાછળનું કારણ કેન્દ્ર સરકારનું આગામી બજેટ છે.

બજેટ અને રવિવારનો અનોખો સંયોગ

વાત એમ છે કે વર્ષ 2026 માં કેન્દ્રીય બજેટની તારીખ, એટલે કે 1 ફેબ્રુઆરી, રવિવારના દિવસે આવે છે. આ કારણે એવી અટકળો ચાલી રહી છે કે શું સરકાર તે જ દિવસે બજેટ રજૂ કરશે? જો આમ થાય, તો બજેટની જાહેરાતો પર બજારની પ્રતિક્રિયા માટે સોમવાર સુધી રાહ જોવી પડી શકે છે.

આ સમસ્યાને ટાળવા અને રોકાણકારોને તરત જ પ્રતિક્રિયા આપવાની તક આપવા માટે, NSE રવિવારે પણ ટ્રેડિંગ સેશન ચાલુ રાખવા પર ગંભીરતાથી વિચાર કરી રહ્યું છે. મીડિયા રિપોર્ટ્સ અનુસાર, NSE માને છે કે બજેટના દિવસે બજાર ખુલ્લું રહેવાથી રોકાણકારો બજેટની જાહેરાતો, જેમ કે ટેક્સમાં ફેરફાર, સરકારી યોજનાઓ અને વિવિધ ક્ષેત્રો માટેની ફાળવણી પર તરત જ પોતાની રોકાણની વ્યૂહરચના ગોઠવી શકશે.

એટલું જ નહીં, એવી પણ ચર્ચાઓ છે કે 31 જાન્યુઆરી, 2026 ના રોજ શનિવારે પણ બજાર ખુલ્લું રહી શકે છે. જોકે, આ અંગે હજુ સુધી કોઈ અંતિમ નિર્ણય લેવાયો નથી.

શું ભૂતકાળમાં આવું બન્યું છે?

આપને જણાવી દઈએ કે ભૂતકાળમાં પણ રવિવારે બજેટ રજૂ થયું છે. 28 ફેબ્રુઆરી, 1999ના રોજ તત્કાલીન નાણામંત્રી યશવંત સિંહાએ રવિવારના દિવસે જ બજેટ રજૂ કર્યું હતું. તે વર્ષે જ બજેટ સાંજે 5 વાગ્યાને બદલે સવારે 11 વાગ્યે રજૂ કરવાની પરંપરા શરૂ થઈ હતી. જોકે, તે સમયે શેરબજાર બંધ રહ્યું હતું. આથી, જો આ વખતે રવિવારે ટ્રેડિંગ થશે તો તે એક ઐતિહાસિક પગલું ગણાશે.