RBIએ આ મોટી બેન્ક પર લગાવેલો પ્રતિબંધ હટાવ્યો, હવે નવા ક્રેડિટ કાર્ડ કરી શકશે ઇશ્યૂ, જાણો સમગ્ર મામલો

પ્રાઇવેટ સેક્ટરની દિગ્ગજ કોટક મહિન્દ્રા બેન્કને ભારતીય રિઝર્વ બેન્ક (RBI) તરફથી મોટી રાહત મળી છે. ટેકનોલોજી સંબંધિત ચિંતાઓને કારણે નવ મહિનાથી વધુ સમયથી કોટક મહિન્દ્રા બેન્ક પર લાદવામાં આવેલા ગંભીર વ્યવસાયિક પ્રતિબંધો RBI એ હટાવી લીધા છે. પીટીઆઈના અહેવાલ મુજબ, રિઝર્વ બેન્ક ઓફ ઈન્ડિયાએ બુધવારે 'સિઝ એન્ડ ડિઝિસ્ટ' આદેશ ઉઠાવી લેવાની જાહેરાત કરી. બેન્કને આપવામાં આવેલી આ રાહત ખૂબ મદદરૂપ થશે.

બેન્ક નવું ક્રેડિટ કાર્ડ ઇશ્યૂ કરી શકશે

સમાચાર અનુસાર, RBI દ્વારા પ્રતિબંધ હટાવ્યા પછી, કોટક મહિન્દ્રા બેન્ક હવે ઓનલાઈન અને મોબાઈલ બેન્કિંગ ચેનલો દ્વારા નવા ક્રેડિટ કાર્ડ ઇશ્યૂ કરી શકશે અને તેને નવા કસ્ટમર્સ ઉમેરવાની પણ પરમિશન આપવામાં આવી છે. RBIએ કહ્યું કે તે પ્રાઇવેટ સેક્ટરની કોટક મહિન્દ્રા બેન્ક દ્વારા લેવામાં આવેલા સુધારાત્મક પગલાંથી સંતુષ્ટ છે. રિપોર્ટ અનુસાર, કોટકે બાહ્ય સલાહકાર પાસેથી થર્ડ-પાર્ટી આઇટી ઓડિટ કરાવ્યું હતું, અને અન્ય ઘણા પગલાં લીધા હતા.

પ્રતિબંધ લાદતા પહેલા ઘણી પ્રોસેસ

ભૂતપૂર્વ ગવર્નર શક્તિકાંત દાસના નેતૃત્વ હેઠળ, RBIએ દેખરેખના પગલા તરીકે અનેક ભૂલ કરનારી સંસ્થાઓ પર વ્યવસાયિક પ્રતિબંધો લાદવાનો આશરો લીધો હતો, જેમાં પ્રાઇવેટ સેક્ટરની સૌથી મોટી ધિરાણકર્તા HDFC બેન્ક પર માર્ચ 2022 સુધી લગભગ 15 મહિનાનો પ્રતિબંધનો સમાવેશ થાય છે. દાસે સમજાવ્યું હતું કે આવા આદેશ પહેલા મહિનાઓ સુધી પત્રવ્યવહાર, ચેતવણીઓ અને મીટિંગો થતી રહે છે. ગયા અઠવાડિયે તેમની પ્રથમ પોલીસી સમીક્ષામાં, તેમના અનુગામી સંજય મલ્હોત્રાએ બેન્કો દ્વારા હાનિકારક ગણાતા નિયમનકારી પાસાઓ પર નરમ વલણ અપનાવવાનો સંકેત આપ્યો હતો, અને સ્પષ્ટ કર્યું હતું કે તેઓ તેનો વધુ ઉપયોગ કરવા માંગશે નહીં.

બેન્કમાં બાકી રહેલા ક્રેડિટ કાર્ડની કુલ સંખ્યા

કેન્દ્રીય બેન્કે જણાવ્યું હતું કે બેન્ક દ્વારા કરવામાં આવેલી રજૂઆતો અને લેવામાં આવેલા ઉપચારાત્મક પગલાંના આધારે રિઝર્વ બેન્કે KMB પર લાદવામાં આવેલા ઉપરોક્ત પ્રતિબંધોને હટાવવાનો નિર્ણય લીધો છે. નવા કસ્ટમર્સનું ડિજિટલ ઓનબોર્ડિંગ ફરી શરૂ કરવા અને નવા ક્રેડિટ કાર્ડ ઇશ્યૂ કરવા માટે RBI સાથે નજીકથી કામ કરવાનું ચાલુ રાખીશું. ડિસેમ્બરમાં કોટક મહિન્દ્રા બેન્કના બાકી રહેલા ક્રેડિટ કાર્ડની કુલ સંખ્યા ઘટીને 50 લાખથી વધુ થઈ ગઈ. માર્ચ 2024માં આ 59 લાખ હતું, જ્યારે આ સ્ટેપ પછી અસુરક્ષિત લોનનો હિસ્સો ઘટીને 10 ટકા થઈ ગયો.