NSE IPO Update: રોકાણકારો માટે મોટા સમાચાર! એનએસઈએ IPOની સાઇઝ ઘટાડીને 23,000 કરોડ કરી, હ્યુન્ડાઈનો રેકોર્ડ નહીં તૂટે

NSE IPO Update: શેરબજારમાં રોકાણ કરતા અને ખાસ કરીને નેશનલ સ્ટોક એક્સચેન્જના IPO ની કાગડોળે રાહ જોઈ રહેલા લોકો માટે એક મોટા અને અગત્યના સમાચાર સામે આવ્યા છે. NSE એ 9 સપ્ટેમ્બરના રોજ પોતાનું અપડેટ કરેલું ડ્રાફ્ટ રેડ હેરિંગ પ્રોસ્પેક્ટસ ફાઈલ કર્યું છે. આ નવા પેપર્સ પરથી જાણવા મળ્યું છે કે એક્સચેન્જે પોતાના IPOના પ્લાનમાં મોટા ફેરફારો કર્યા છે. તમને જણાવી દઈએ કે, NSE દેશનું સૌથી મોટું સ્ટોક એક્સચેન્જ છે અને તેની સીધી ટક્કર પહેલેથી જ શેરબજારમાં લિસ્ટેડ BSE સાથે છે.

IPOની સાઈઝ ઘટી, હવે 23,000 કરોડનો અંદાજ

સૌથી મોટો ફેરફાર IPOની સાઇઝમાં જોવા મળ્યો છે. પહેલા એવો અંદાજ હતો કે NSEનો IPO 30,000 કરોડ રૂપિયાનો હશે. પરંતુ, લેટેસ્ટ અપડેટ મુજબ હવે આ સાઇઝ ઘટાડીને 23,000 કરોડ રૂપિયા કરી દેવામાં આવી છે. એક્સચેન્જે પોતાના અપડેટેડ ડ્રાફ્ટ પેપર્સમાં આ માહિતી સ્પષ્ટ કરી છે.

હ્યુન્ડાઈનો રેકોર્ડ અકબંધ રહેશે

આ સાઈઝ ઘટવાનો સીધો અર્થ એ છે કે, હવે NSEનો IPO દેશના સૌથી મોટા IPOનો રેકોર્ડ તોડી શકશે નહીં. આ રેકોર્ડ હજુ પણ Hyundai Motor Indiaના નામે જ રહેશે. હ્યુન્ડાઈનો IPO 27,870 કરોડ રૂપિયાનો હતો, જે ભારતના ઈતિહાસનો અત્યાર સુધીનો સૌથી મોટો IPO છે. આ પહેલા 2022માં LIC એ 21,000 કરોડ રૂપિયાનો IPO લાવ્યો હતો. શરૂઆતમાં માર્કેટને આશા હતી કે NSE હ્યુન્ડાઈનો રેકોર્ડ તોડશે, પણ હવે આ શક્ય નથી.

સંપૂર્ણપણે ઓફર ફોર સેલ હશે

આ IPOની સાઈઝ ઘટવાનું મુખ્ય કારણ એ છે કે કંપનીના અમુક જૂના રોકાણકારોએ હવે પહેલા કરતા ઓછા શેર વેચવાનો નિર્ણય લીધો છે. નોંધનીય છે કે આ IPO 100% ઓફર ફોર સેલ હશે. એટલે કે, આમાં કોઈ નવા શેર બહાર પાડવામાં આવશે નહીં અને IPO થકી મળેલા નાણાં કંપની પાસે નહીં જાય. માત્ર જૂના શેરધારકો જ પોતાના શેર વેચીને નફો બુક કરશે.