ભારત-અમેરિકા વેપાર કરાર પર મોટી અપડેટ: દિલ્હીમાં 3 દિવસ ચાલશે મંત્રણા, શું ટેરિફ ઘટશે?

India-US Trade Deal: ભારત અને અમેરિકા વચ્ચેના વેપાર સંબંધોમાં એક મોટા અને સકારાત્મક સમાચાર સામે આવી રહ્યા છે. લાંબા સમયથી જેની રાહ જોવાઈ રહી હતી તે ટ્રેડ ડીલ હવે અંતિમ તબક્કામાં પહોંચી ગઈ છે. આ ડીલને ફાઇનલ કરવા માટે અમેરિકાના ઉચ્ચ અધિકારીઓની એક ટીમ આગામી સપ્તાહે ભારતની મુલાકાતે આવી રહી છે, જ્યાં 3 દિવસ સુધી ચાલનારી બેઠકમાં મહત્ત્વપૂર્ણ નિર્ણયો લેવાઈ શકે છે.

શા માટે આ બેઠક ખાસ છે?

મળતી માહિતી મુજબ, અમેરિકન ટીમનું નેતૃત્વ ડેપ્યુટી યુનાઇટેડ સ્ટેટ્સ ટ્રેડ રિપ્રેઝન્ટેટિવ (USTR) રિક સ્વિટ્ઝર કરશે. આ મહત્ત્વપૂર્ણ બેઠક 10 ડિસેમ્બરથી શરૂ થશે અને 12 ડિસેમ્બર સુધી ચાલશે. આ ચર્ચાનો મુખ્ય ઉદ્દેશ્ય વેપાર સમજૂતીના પહેલા તબક્કાને આખરી ઓપ આપવાનો છે. આ ઉપરાંત, ભારતીય ઉત્પાદનો પર અમેરિકા દ્વારા લગાવવામાં આવેલા ભારે ટેરિફમાં ઘટાડો કરવા અંગે પણ ચર્ચા થવાની પ્રબળ સંભાવના છે, જે ભારતીય નિકાસકારો માટે રાહતના સમાચાર લાવી શકે છે.

ટેરિફ અને રશિયન ક્રૂડ ઓઇલનો મુદ્દો

ઉલ્લેખનીય છે કે, અમેરિકાના રાષ્ટ્રપતિ ડોનાલ્ડ ટ્રમ્પે ઓગસ્ટ મહિનામાં રશિયન ક્રૂડ ઓઇલની ખરીદીના મુદ્દે ભારત પર લગાવેલો 25% ટેરિફ વધારીને સીધો 50% કરી દીધો હતો. આ નિર્ણય બાદ બંને દેશો વચ્ચે વેપાર કરારની વાતચીત અટકી ગઈ હતી. જોકે, સપ્ટેમ્બરમાં અમેરિકન અધિકારીઓની ભારત મુલાકાત બાદ ફરીથી વાતચીત શરૂ થઈ હતી અને હવે આ બીજી મુલાકાત ડીલને અંતિમ રૂપ આપી શકે છે.

બંને દેશો તરફથી મળ્યા સકારાત્મક સંકેતો

છેલ્લા કેટલાક સમયથી ભારત અને અમેરિકા બંને તરફથી આ ડીલને લઈને હકારાત્મક નિવેદનો આવી રહ્યા છે.