જ્યોતિ મલ્હોત્રા જાસૂસી કેસ: લક્ઝરી લાઈફસ્ટાઈલનું કાળું સત્ય, વિદેશ યાત્રાઓથી VIP મુલાકાતો સુધીની તપાસ

પાકિસ્તાન માટે જાસૂસીના આરોપમાં ઝડપાયેલી હિસારની યુટ્યુબર જ્યોતિ મલ્હોત્રાની લક્ઝરી લાઈફસ્ટાઈલ અને વિદેશ યાત્રાઓએ તપાસ એજન્સીઓના કાન ખડકી દીધા છે. વૈભવી હોટલોમાં રોકાણ, VIP લોકો સાથે મુલાકાતો અને તેની આવકથી વધુ ખર્ચાઓએ તપાસ એજન્સીઓને શંકાના ઘેરામાં મૂકી દીધી છે. જ્યોતિના બેંક ખાતાઓની તપાસથી લઈને તેની વિદેશ યાત્રાઓ દરમિયાન શેર કરાયેલી માહિતી સુધી, તપાસ એજન્સીઓ દરેક પાસાને ઊંડાણપૂર્વક ચકાસી રહી છે.

લક્ઝરી લાઈફનું રહસ્ય અને આવકથી વધુ ખર્ચ

જ્યોતિ મલ્હોત્રાની ધરપકડ બાદ તપાસ એજન્સીઓએ તેના ફાઈનાન્શિયલ રેકોર્ડ્સ ખંખાળ્યા, જેમાં ચોંકાવનારી હકીકતો સામે આવી. તેના ખર્ચાઓ તેની જાણીતી આવક કરતાં ઘણા વધુ હતા. વિદેશ યાત્રાઓ, આલીશાન હોટલોમાં રોકાણ અને VIP લોકો સાથેની બેઠકોએ તપાસ એજન્સીઓને સવાલો ઉભા કર્યા છે. આ ખર્ચાઓ માટે પૈસા ક્યાંથી આવ્યા? આ યાત્રાઓ દરમિયાન કઈ માહિતી શેર થઈ? આવા મુદ્દાઓ તપાસના કેન્દ્રમાં છે.

પિતા અને કાકાના એકાઉન્ટ્સ પણ સ્કેનર હેઠળ

તપાસ એજન્સીઓ જ્યોતિના બેંક ખાતાઓની વિગતો ચકાસી રહી છે. તેના ઘરેથી મળેલી બેંક પાસબુકના આધારે તેના ટ્રાન્ઝેક્શન્સની તપાસ ચાલી રહી છે. આ સાથે, જ્યોતિના પિતા હરીશ મલ્હોત્રા અને કાકાના બેંક ખાતાઓની પણ ચકાસણી કરવામાં આવી. જોકે, પોલીસે હરીશ અને તેમના ભાઈના બેંક રેકોર્ડ્સ પરત કરી દીધા છે, પરંતુ જ્યોતિના ખાતાઓની તપાસ હજુ ચાલુ છે. તપાસમાં ફોકસ જ્યોતિને મળેલા ફંડ્સ અને તેના ખર્ચના સોર્સ પર છે.

પિતાનો દાવો: ‘પોલીસે ફોન અને બેંક ડિટેલ્સ લીધી’

હિસારની ન્યૂ અગ્રસેન કોલોનીમાં રહેતા જ્યોતિના પિતા હરીશ મલ્હોત્રાએ જણાવ્યું કે, “ગુરુવાર અને શુક્રવારે પોલીસ અમારા ઘરે આવી. તેમણે મારા, મારા ભાઈ અને જ્યોતિના બેંક ખાતાઓની નકલો અને પાસબુક તેમજ અમારા ફોન લઈ ગયા. શુક્રવારે તપાસ બાદ પોલીસે મારી અને મારા ભાઈની બેંક ડિટેલ્સ પરત કરી, પરંતુ જ્યોતિની બેંક પાસબુક અને અમારા ફોન હજુ પરત કર્યા નથી.” તેમણે ઉમેર્યું કે, “અમારા ખાતાઓમાંથી પોલીસને કંઈ મળ્યું નથી. જ્યોતિના ખાતામાં કેટલા પૈસા છે અને તે ક્યાંથી આવ્યા, તેની અમને કોઈ જાણકારી નથી. તેનું ખાતું PNB બેંકમાં છે.”