અમેરિકા-ઈરાન યુદ્ધ: તણાવ ચરમસીમાએ! ઈરાનનો અમેરિકન યુદ્ધ જહાજો પર મિસાઈલ હુમલો, અમેરિકાએ 3 ઈરાની ટેન્કરો ઉડાવ્યા

અમેરિકાની ચેતવણી: અમેરિકન સેન્ટ્રલ કમાન્ડના કમાન્ડર એડમિરલ બ્રેડ કૂપરે અગાઉ ચેતવણી આપી હતી કે, "જો તમે અમારા 2 જહાજો પર ગોળી ચલાવશો, તો અમે તમારા 3 જહાજો નષ્ટ કરીશું અને તેની ભારે આર્થિક કિંમત તમારે ચૂકવવી પડશે."

ઈરાનનો વળતો જવાબ: IRGC એ કહ્યું છે કે જો અમેરિકા તેની દુશ્મનાવટ ભરી હરકતો ચાલુ રાખશે, તો તેમને ઈરાની સેના તરફથી હજુ વધુ આકરા જવાબની અપેક્ષા રાખવી જોઈએ. ઈરાને એમ પણ કહ્યું કે તેમણે હોર્મુઝની સામુદ્રધુનીમાંથી પસાર થતા અન્ય 3 ટેન્કરોને પણ નિશાન બનાવ્યા છે જે અમેરિકા સાથે જોડાયેલા હતા. જોકે, અમેરિકન સૈન્યનું કહેવું છે કે તેમનું એરક્રાફ્ટ કરિયર અને ડિસ્ટ્રોયર ઈરાનના હુમલાઓથી બચીને સુરક્ષિત નીકળી ગયા છે. આ સમગ્ર ઘટનાક્રમમાં કોઈ પણ અમેરિકન સૈનિકને ઈજા પહોંચી નથી.

PM મોદીની યુદ્ધ રોકવાની અપીલ

આ ગંભીર યુદ્ધની સ્થિતિ વચ્ચે ભારત પણ સક્રિય થયું છે. વડાપ્રધાન નરેન્દ્ર મોદીએ તાજેતરમાં જ ઈરાનના રાષ્ટ્રપતિ મસૂદ પેજેશ્કિયન સાથે મુલાકાત કરી હતી. કિર્ગિસ્તાનની રાજધાની બિશ્કેકમાં યોજાયેલી શંઘાઈ સહયોગ સંગઠનની બેઠક દરમિયાન બંને નેતાઓ મળ્યા હતા. પીએમ મોદીએ પશ્ચિમ એશિયામાં યુદ્ધ ખતમ કરવાના તમામ પ્રયાસોને ભારતનું સમર્થન જાહેર કર્યું. તેમણે દરિયાઈ માર્ગે જહાજોની મુક્ત અવરજવર અને નાગરિકોની સુરક્ષા પર ભાર મૂક્યો હતો. ઈરાનના રાષ્ટ્રપતિ પેજેશ્કિયને પીએમ મોદીને અપીલ કરી કે ભારત પોતાના વૈશ્વિક સંપર્કો અને પ્રભાવનો ઉપયોગ કરીને તમામ પક્ષોને યુદ્ધ અને લોહી-ખરાબાથી દૂર કરી વાતચીતના ટેબલ પર લાવવામાં મદદ કરે. વિદેશ મંત્રાલયના જણાવ્યા અનુસાર, પીએમ મોદીએ સ્પષ્ટ કર્યું કે તમામ મુદ્દાઓનો ઉકેલ કૂટનીતિ અને વાતચીત દ્વારા જ આવવો જોઈએ. સાથે જ, ભારતે આવનારા સમયમાં ઈરાન સાથે વેપાર વધારવાની ઈચ્છા પણ વ્યક્ત કરી છે. પીએમ મોદીએ બ્રિક્સ સમિટ માટે રાષ્ટ્રપતિ પેજેશ્કિયનનું ભારતમાં સ્વાગત કરવા માટેની ઉત્સુકતા પણ દર્શાવી છે.

આ પણ વાંચો- શેરબજાર નિષ્ણાતની ચેતવણી: નવા સપ્તાહમાં નિફ્ટી 23500ની નીચે જઈ શકે છે, પરંતુ આ 2 મજબૂત શેર કરાવશે તગડી કમાણી!

અમેરિકા અને ઈરાન વચ્ચેનો આ સંઘર્ષ હવે માત્ર બે દેશો પૂરતો સીમિત રહ્યો નથી, પરંતુ આખી દુનિયાના વેપાર અને સમુદ્રી સુરક્ષા માટે ખતરો બની ગયો છે. ભારત જેવા દેશો આ સમસ્યાનો કૂટનીતિક ઉકેલ લાવવા પ્રયાસ કરી રહ્યા છે, પરંતુ હાલની પરિસ્થિતિ જોતા બંને દેશો વચ્ચે તણાવ હજુ વધુ ભડકી શકે તેવી પૂરી શક્યતા છે. આંતરરાષ્ટ્રીય સ્તરે આ હુમલાઓની ઘેરી અસર વર્તાઈ રહી છે.