શેર બજારમાં કડાકો: સેન્સેક્સ 550 પોઈન્ટ તૂટ્યો અને નિફ્ટી 25700 ની નીચે, જાણો ઘટાડા પાછળનાં 4 મુખ્ય કારણો

Share Market Fall: શેર બજારમાં સળંગ ત્રણ દિવસથી ચાલી આવતી તેજી પર ગુરુવારે બ્રેક વાગી ગઈ છે. 19 ફેબ્રુઆરીના રોજ ભારતીય બજારે પોતાની શરૂઆતી લીડ ગુમાવી દીધી અને લાલ નિશાનમાં સરકી ગયું. શરૂઆતી કારોબારમાં સેન્સેક્સ તેના દિવસના સૌથી ઊંચા સ્તરથી લગભગ 550 પોઈન્ટ જેટલો નીચે પટકાયો હતો. બીજી તરફ નિફ્ટી પણ 25750 ની સપાટી તોડીને નીચે આવી ગયો હતો.

બજારમાં આવેલી આ અચાનક નરમાઈ પાછળ નફાવસૂલી અને ક્રૂડ ઓઈલના વધતા ભાવોને મુખ્ય કારણ માનવામાં આવે છે. આજના ટ્રેડિંગ સેશનમાં આઈટી અને ફાર્મા સેક્ટરને બાદ કરતા મોટાભાગના સેક્ટોરલ ઈન્ડેક્સ લાલ નિશાનમાં બંધ રહ્યા હતા. ખાસ કરીને રિયલ્ટી, કન્ઝ્યુમર ડ્યુરેબલ, એફએમસીજી અને કેપિટલ ગુડ્સ શેરોમાં સૌથી વધુ વેચવાલી જોવા મળી હતી. સવારે 11:25 વાગ્યા આસપાસ બીએસઈ સેન્સેક્સ 420.48 પોઈન્ટના ઘટાડા સાથે 83313.77 પર કારોબાર કરી રહ્યો હતો. આ જ સમયે નિફ્ટી 128.75 પોઈન્ટ ઘટીને 25690.60 પર આવી ગયો હતો.

આજના આ કડાકા પાછળ કયા 4 પરિબળોએ સૌથી મોટો ભાગ ભજવ્યો છે તે સમજવું રોકાણકારો માટે જરૂરી છે.

1) ઊંચા મથાળે નફાવસૂલી

છેલ્લા ત્રણ દિવસમાં સેન્સેક્સ અને નિફ્ટીમાં 1.4 ટકા જેટલો ઉછાળો જોવા મળ્યો હતો. ડિસેમ્બર ક્વાર્ટરના પરિણામો અપેક્ષા મુજબના આવતા બજારને સારો ટેકો મળ્યો હતો. પણ આ ઊંચા સ્તરે રોકાણકારોએ હવે નફો બુક કરવાનું શરૂ કરી દીધું છે. ટ્રેડિંગ દરમિયાન 16 માંથી 13 મુખ્ય સેક્ટર દબાણ હેઠળ હતા. મિડકેપ અને સ્મોલકેપ શેરોમાં પણ થોડી નિરાશા જોવા મળી. ચોઈસ બ્રોકિંગના ટેકનિકલ એનાલિસ્ટ આકાશ શાહના મતે બજારમાં અત્યારે સ્ટોક સ્પેસિફિક મૂવમેન્ટ છે અને રોકાણકારો ખૂબ જ સાવચેતીપૂર્વક આગળ વધી રહ્યા છે.

2) કાચા તેલની કિંમતોમાં ઉછાળો

અમેરિકા અને ઈરાન વચ્ચેના સંભવિત તણાવના અહેવાલોથી ગ્લોબલ સપ્લાય ખોરવાઈ શકે તેવી ચિંતા ઊભી થઈ છે. તેના કારણે ક્રૂડ ઓઈલના ભાવમાં મોટો ઉછાળો આવ્યો છે. બ્રેન્ટ ક્રૂડ 70 ડોલર પ્રતિ બેરલની આસપાસ ટ્રેડ થઈ રહ્યું છે. તેમાં છેલ્લા સત્રમાં 4 ટકાથી વધુની તેજી નોંધાઈ હતી. ભારત મોટા પાયે તેલની આયાત કરે છે એટલે ક્રૂડના વધતા ભાવ દેશમાં મોંઘવારી અને કરંટ એકાઉન્ટ ડેફિસિટ વધારી શકે છે, જેની સીધી અસર માર્કેટના સેન્ટિમેન્ટ પર પડી છે.