ઓનલાઈન ગેમિંગ બિલને મંજૂરી: જુગાર અને સટ્ટાબાજી પર પ્રતિબંધ, 3 વર્ષની જેલ અને 1 કરોડનો દંડ

Online Gaming Bill: કેન્દ્રીય મંત્રીમંડળે મંગળવારે ઓનલાઈન ગેમિંગ બિલને મંજૂરી આપી છે, જે દેશમાં ઓનલાઈન પ્લેટફોર્મ્સ પર જુગાર અને સટ્ટાબાજીને ગુનો બનાવે છે. આ બિલનો હેતુ ઓનલાઈન ગેમિંગ પ્લેટફોર્મ્સને કાનૂની ઢાંચામાં લાવવાનો અને ડિજિટલ એપ્સ દ્વારા જુગાર રમવા પર દંડની જોગવાઈ કરવાનો છે. આ બિલ સટ્ટાબાજી એપ્સને નિયંત્રિત કરવામાં અને ગેરકાયદેસર પ્રવૃત્તિઓ રોકવામાં મહત્વની ભૂમિકા ભજવશે.

સરકારની કડક નજર

સરકાર છેલ્લા કેટલાક વર્ષોથી આ ક્ષેત્રમાં ગેરકાયદેસર આવક પર નજર રાખી રહી છે. ઓક્ટોબર 2023થી ઓનલાઈન ગેમિંગ પર 28% GST લાગુ કરવામાં આવ્યો છે, જ્યારે 2024-25ના નાણાકીય વર્ષથી ગેમિંગમાંથી મળેલી જીત પર 30% ટેક્સ લાગે છે. આ ઉપરાંત, ઑફશોર ગેમિંગ પ્લેટફોર્મ્સને પણ ટેક્સના દાયરામાં લાવવામાં આવ્યા છે, અને એજન્સીઓને ગેરકાયદેસર સાઈટ્સ બ્લોક કરવાની સત્તા આપવામાં આવી છે.

નવા નિયમો અને સજા

આ બિલ હેઠળ ઓનલાઈન મની ગેમ્સ અને સટ્ટાબાજી સેવાઓ પર પ્રતિબંધ મૂકવામાં આવ્યો છે. આવા ગેમ્સના વિજ્ઞાપનો પર પણ રોક લગાવવામાં આવી છે. બેંકો અને નાણાકીય સંસ્થાઓ દ્વારા આવા ગેમ્સ માટે લેવડ-દેવડ પર પણ પ્રતિબંધ છે. ઓનલાઈન મની ગેમ માટે ફી ચૂકવવી કે પૈસા જમા કરવાનું ઉલ્લંઘન કરનારને 3 વર્ષની જેલ અને 1 કરોડ રૂપિયાનો દંડ થશે. સટ્ટાબાજી એપ્સના વિજ્ઞાપન કરનારને 2 વર્ષની જેલ અને 50 લાખ રૂપિયાનો દંડ થશે. ગેમમાં નાણાકીય લેન-દેન કરનારને 3 વર્ષની જેલ અને 1 કરોડ રૂપિયાનો દંડ થશે.

સરકારના અગાઉના પગલાં

2022થી ફેબ્રુઆરી 2025 સુધીમાં, સરકારે 1,400થી વધુ સટ્ટાબાજી અને જુગારની વેબસાઈટ્સ અને એપ્સ બ્લોક કરી છે. જુગારની લતથી બચવા માટે શિક્ષણ મંત્રાલયે વાલીઓ અને શિક્ષકોને સલાહ આપી છે, જ્યારે માહિતી અને પ્રસારણ મંત્રાલયે ટીવી ચેનલોને ગેમિંગ વિજ્ઞાપનોમાં નાણાકીય જોખમો અને લતની ચેતવણી આપતા ડિસ્ક્લેમર ઉમેરવાનું ફરજિયાત કર્યું છે.