તિબેટ-નેપાળ બોર્ડર પર પૂરનો કહેર, ઈશા ફાઉન્ડેશનના 80 શ્રદ્ધાળુઓ ગુમ, ભાવુક થઈ સદ્ગુરુ બોલ્યા- 'અમને પણ ત્યાં જવા દો'

કૈલાસ માનસરોવર યાત્રાએ ગયેલા શ્રદ્ધાળુઓ માટે એક અત્યંત દુઃખદ સમાચાર સામે આવ્યા છે. તિબેટ અને નેપાળની બોર્ડર પર અચાનક આવેલા ભયાનક પૂરને કારણે ભારે તારાજી સર્જાઈ છે. આ પૂરમાં 130 થી વધુ ભારતીય શ્રદ્ધાળુઓ ગુમ થયા હોવાના અહેવાલ છે. આ દરમિયાન તમિલનાડુના કોઈમ્બતુર સ્થિત ઈશા ફાઉન્ડેશને દાવો કર્યો છે કે, તેમના સંગઠન સાથે જોડાયેલા 80 સભ્યો (77 તીર્થયાત્રીઓ અને 3 સ્વયંસેવકો) ઈમિગ્રેશન સેન્ટર પરથી ગુમ થઈ ગયા છે.

આ દુર્ઘટના વિશે વાત કરતા આધ્યાત્મિક ગુરુ અને ઈશા ફાઉન્ડેશનના સ્થાપક સદ્ગુરુ જાગ્ગી વાસુદેવ અત્યંત ભાવુક થઈ ગયા હતા.

સદ્ગુરુએ X પર વીડિયો શેર કરી શું કહ્યું?

સદ્ગુરુએ સોશિયલ મીડિયા પ્લેટફોર્મ X પર એક વીડિયો પોસ્ટ કરીને જણાવ્યું કે, સ્થિતિ ખૂબ જ ગંભીર છે અને નુકસાનનો સાચો આંકડો મેળવવો હાલ મુશ્કેલ છે. તેમણે કહ્યું કે તેઓ પોતે ઘટનાસ્થળે પહોંચવાનો પ્રયાસ કરી રહ્યા છે. રસ્તાઓ અને પુલ તૂટી ગયા છે તેમજ ફોન અને ટેલિકોમ્યુનિકેશન સેવાઓ સાવ બંધ છે.

સદ્ગુરુએ કહ્યું કે, "અમે ભારતીય, ચીની અને અમેરિકી દૂતાવાસો દ્વારા ત્યાં પહોંચવાની પરવાનગી લેવાનો પ્રયાસ કરી રહ્યા છીએ, જેથી અમે બચાવ કામગીરીમાં મદદ કરી શકીએ. અમને પણ ત્યાં જવા દો."

ગુમ થયેલા 80 લોકોના ગ્રુપની વિગત

સદ્ગુરુએ માહિતી આપતા જણાવ્યું કે આ 'S3' ગ્રુપ હતું. આ ગ્રુપમાં કુલ 80 લોકો સામેલ હતા, જેમાં 34 પુરુષો અને 46 મહિલાઓ હતી. 22 અમેરિકા, 12 કેનેડા, 11 ઓસ્ટ્રેલિયા, 9 યુનાઇટેડ કિંગડમ, 4 જર્મની, 3 ફ્રાન્સ, 3 નેપાળ, 2 નેધરલેન્ડ, 2 ન્યુઝીલેન્ડ, 2 સિંગાપોર અને 2 સ્પેન..આ ઉપરાંત ફિનલેન્ડ, હંગેરી, ઈઝરાયેલ, લિથુઆનિયા, ફિલિપાઈન્સ, પોર્ટુગલ, રશિયા અને સાઉથ આફ્રિકાના 1-1 વ્યક્તિનો સમાવેશ થાય છે.