રામ મંદિર ટ્રસ્ટના પહેલા CEO બન્યા રિટાયર્ડ એર માર્શલ જિતેન્દ્ર મિશ્રા, કારગિલ યુદ્ધમાં ભજવી હતી અહેમ ભૂમિકા, જાણો તેમની પ્રોફાઇલ

અયોધ્યાના રામ મંદિરના સંચાલનને લઈને એક મોટા અને ઐતિહાસિક સમાચાર સામે આવ્યા છે. લાંબા સમયથી એવી અટકળો ચાલી રહી હતી કે રામ મંદિર ટ્રસ્ટના નવા CEO તરીકે કોને જવાબદારી સોંપવામાં આવશે. અંતે 2 સપ્ટેમ્બરના રોજ આ અંગેનો મોટો નિર્ણય લેવાઈ ગયો છે. રિટાયર્ડ એર માર્શલ જિતેન્દ્ર મિશ્રા હવે અયોધ્યા રામ મંદિર ટ્રસ્ટના પ્રથમ CEO તરીકેનો કાર્યભાર સંભાળશે.

કોણ છે રિટાયર્ડ એર માર્શલ જિતેન્દ્ર મિશ્રા?

મૂળ ઉત્તર પ્રદેશના દેવરિયાના વતની જિતેન્દ્ર મિશ્રા ભારતીય વાયુસેનામાં પશ્ચિમી કમાનના ચીફ રહી ચૂક્યા છે. તેઓ 30 એપ્રિલ 2026 ના રોજ પોતાની શાનદાર કારકિર્દીમાંથી નિવૃત્ત થયા છે. દેશની સુરક્ષામાં તેમનું યોગદાન અમૂલ્ય રહ્યું છે. ખાસ કરીને 'ઓપરેશન સિંદૂર' અને ઐતિહાસિક 'કારગિલ યુદ્ધ'માં તેમણે ખૂબ જ મહત્વની ભૂમિકા ભજવી હતી.

તેમની ઉત્કૃષ્ટ અને બહાદુરીભરી સેવાઓ બદલ તેમને સર્વોત્તમ યુદ્ધ સેવા મેડલ, અતિ વિશિષ્ટ સેવા મેડલ અને વિશિષ્ટ સેવા મેડલથી સન્માનિત કરવામાં આવ્યા છે. પોતાના 38 વર્ષથી વધુના કરિયરમાં તેમણે વાયુસેનામાં અનેક કમાન્ડ અને સ્ટાફ પદો સંભાળ્યા છે. જેમાં ફાઇટર સ્ક્વોડ્રનના કમાન્ડિંગ ઓફિસર, ASTE માં ચીફ ટેસ્ટ પાયલટ, બે ફ્રન્ટલાઇન એર બેઝના એર ઓફિસર કમાન્ડિંગ અને ઇન્ટિગ્રેટેડ ડિફેન્સ સ્ટાફના ડેપ્યુટી ચીફ જેવા અત્યંત મહત્વના પદોનો સમાવેશ થાય છે.

રામ મંદિર ટ્રસ્ટમાં કેમ કરાયો આ મોટો વહીવટી ફેરફાર?

છેલ્લા કેટલાક સમયથી અયોધ્યા રામ મંદિરમાં આવેલા દાનમાં મોટી ચોરી થઈ હોવાના આક્ષેપો લાગ્યા હતા. આ ગંભીર વિવાદ બાદ રામ મંદિર ટ્રસ્ટના મહાસચિવ ચંપત રાય અને અનિલ મિશ્રાને તેમના પદ પરથી હટાવવામાં આવ્યા હતા. ત્યારબાદ મંદિરના વહીવટમાં સંપૂર્ણ પારદર્શિતા લાવવા માટે પહેલીવાર એક CEOની નિમણૂક કરવાનો નિર્ણય લેવાયો હતો.

આ પદ માટે પૂર્વ IPS અધિકારી રાજેશ પાંડે, પૂર્વ IAS અધિકારી દિનેશ ચંદ્ર, રિટાયર્ડ IAS યોગેશ્વર રામ મિશ્રા અને પૂર્વ IPS પરેશ સક્સેના જેવા મોટા નામો પણ રેસમાં હતા. પરંતુ આખરે રિટાયર્ડ એર માર્શલ જિતેન્દ્ર મિશ્રાના નામ પર મહોર વાગી છે.