ડોનાલ્ડ ટ્રમ્પનો 'DOGE' વિભાગ 10 મહિનામાં જ બંધ, અમેરિકાનું દેવું $2.1 ટ્રિલિયન વધ્યું: શું ટેરિફના નિર્ણય બદલાશે?

Donald Trump DOGE: અમેરિકી રાષ્ટ્રપતિ ડોનાલ્ડ ટ્રમ્પના બીજા કાર્યકાળની શરૂઆતમાં લેવાયેલા અનેક તાબડતોબ નિર્ણયોમાંથી એક ચર્ચાસ્પદ નિર્ણય હતો "ડિપાર્ટમેન્ટ ઑફ ગવર્નમેન્ટ એફિશિયન્સી" એટલે કે DOGE નામના વિભાગનું ગઠન. 20 જાન્યુઆરીએ ટ્રમ્પે આ વિભાગની જાહેરાત કરી હતી, જેનો મુખ્ય હેતુ સરકારી ખર્ચમાં ઘટાડો કરવાનો હતો. દુનિયાના સૌથી ધનિક વ્યક્તિ એલોન મસ્કને આ વિભાગની કમાન સોંપવામાં આવી હતી. જોકે, આ વિભાગ તેના ઉદ્દેશ્યો પૂરા કરવામાં નિષ્ફળ રહ્યો અને હવે તે બંધ કરી દેવામાં આવ્યો છે.

શરૂઆતથી જ વિવાદમાં રહેલો DOGE વિભાગ

DOGE વિભાગ શરૂઆતથી જ વિવાદોમાં ઘેરાયેલો રહ્યો હતો. એલોન મસ્ક પણ પાછળથી આ વિભાગથી દૂર થઈ ગયા હતા. આ વિભાગનો દાવો હતો કે તે સરકારી વિભાગોના ખર્ચ અને પુનર્ગઠન દ્વારા અબજો ડોલરની બચત કરી શકશે. જોકે, આ વિભાગ અમેરિકાના સતત વધતા રાષ્ટ્રીય દેવાને રોકવામાં સંપૂર્ણપણે નિષ્ફળ રહ્યો.

DOGE વિભાગ માત્ર 326 દિવસ સુધી જ અસ્તિત્વમાં હતો. આ ટૂંકાગાળા દરમિયાન, અમેરિકાનું દેવું $2.1 ટ્રિલિયન જેટલું વધી ગયું. આનો અર્થ છે કે, DOGEના કાર્યકાળ દરમિયાન અમેરિકા પર દરરોજ સરેરાશ $6.5 બિલિયનનું નવું દેવું ચડતું હતું. હાલમાં, દેશનું કુલ દેવું વધીને $38.3 ટ્રિલિયન સુધી પહોંચી ગયું છે, જે એક ચિંતાજનક આંકડો છે.

ટેરિફ પર સવાલો: શું ટ્રમ્પનું વલણ બદલાશે?

DOGE વિભાગના અસ્તિત્વના અંત સાથે હવે ટ્રમ્પના બીજા મહત્ત્વના નિર્ણયો પર પણ સવાલો ઉભા થઈ રહ્યા છે. ખાસ કરીને ટેરિફ (આયાત શુલ્ક) પર જે રીતે ટ્રમ્પ સતત પોતાનું વલણ બદલી રહ્યા છે, તેનાથી એવું લાગી રહ્યું છે કે તેઓ આ નિર્ણયને પણ વહેલા-મોડા રદ કરી શકે છે. ટ્રમ્પે દુનિયાના ઘણા દેશો પર ટેરિફ લગાવ્યા છે. ભારત પર પણ સૌથી વધુ 50% જેટલો ટેરિફ લાદવામાં આવ્યો છે. આમાં રશિયા પાસેથી ક્રૂડ ઑઇલ ખરીદવાના કારણે લગાવવામાં આવેલો 25%નો વધારાનો ટેરિફ પણ શામેલ છે.

DOGEની નિષ્ફળતા અને અમેરિકી દેવાના આ સ્તરે પહોંચવાને કારણે, ડોનાલ્ડ ટ્રમ્પ પ્રશાસનની ભવિષ્યની આર્થિક નીતિઓ પર હવે ગંભીર ચર્ચા અને અનિશ્ચિતતા સ્પષ્ટપણે દેખાઈ રહી છે.