BBC India: વિદેશી ભંડોળમાં ગેરરીતિઓ બદલ EDએ BBC India સામે દાખલ કર્યો કેસ

BBC India: એન્ફોર્સમેન્ટ ડિરેક્ટોરેટ (ED) એ બ્રિટિશ બ્રોડકાસ્ટિંગ કોર્પોરેશન (BBC) ઈન્ડિયા સામે ફોરેન એક્સચેન્જ મેનેજમેન્ટ એક્ટ (FEMA) હેઠળ વિદેશી ભંડોળમાં અનિયમિતતા માટે કેસ નોંધ્યો છે. ન્યૂઝ એજન્સી ANIએ ગુરુવારે એન્ફોર્સમેન્ટ ડિરેક્ટોરેટ દ્વારા આ જાણકારી આપી. તમને જણાવી દઈએ કે આ વર્ષે 14 ફેબ્રુઆરીએ ઈન્કમટેક્સે દિલ્હી અને મુંબઈ સ્થિત બીબીસી ઈન્ડિયાની ઓફિસમાં સર્વે કર્યો હતો. આ સર્વે લગભગ 60 કલાક સુધી ચાલ્યો હતો.

સમાચાર એજન્સી પીટીઆઈના જણાવ્યા અનુસાર, તપાસ એજન્સીએ ફેમાની જોગવાઈઓ હેઠળ કંપનીના કેટલાક અધિકારીઓના દસ્તાવેજો અને નિવેદનોનું રેકોર્ડિંગ પણ માંગ્યું છે. ફેબ્રુઆરીમાં આવકવેરા વિભાગે દિલ્હી અને મુંબઈમાં બીબીસીની ઓફિસનો સર્વે કર્યા બાદ આ પગલું લેવામાં આવ્યું છે.

સેન્ટ્રલ બોર્ડ ઓફ ડાયરેક્ટ ટેક્સિસ (સીબીડીટી) એ પાછળથી જણાવ્યું હતું કે આવકવેરા અધિકારીઓ, જેમણે દિલ્હી અને મુંબઈમાં 58 કલાકથી વધુ સમય સુધી બીબીસી ઓફિસનો "સર્વે" હાથ ધર્યો હતો, તેઓએ ટ્રાન્સફર પ્રાઇસિંગ દસ્તાવેજો સંબંધિત "નોંધપાત્ર" પુરાવા શોધી કાઢ્યા હતા. સીબીડીટીએ એમ પણ કહ્યું હતું કે આવકવેરા સત્તાવાળાઓને ટ્રાન્સફર પ્રાઇસિંગ દસ્તાવેજોમાં ઘણી ખામીઓ મળી છે.

સીબીડીટીએ કહ્યું હતું કે બીબીસી ગ્રૂપની વિવિધ સંસ્થાઓ દ્વારા દર્શાવવામાં આવેલી આવક અને નફાના આંકડા ભારતમાં તેમની કામગીરી સાથે સુસંગત નથી. આ નિવેદન બ્રિટિશ મીડિયા યુનિટ સામે આવકવેરા સત્તાવાળાઓ દ્વારા ત્રણ દિવસના લાંબા સર્વેક્ષણના એક દિવસ પછી આવ્યું છે. .