પાકિસ્તાનના પૂર્વ PM ઇમરાન ખાન નોબેલ પ્રાઇઝ માટે નામાંકિત, લાંબા સમયથી છે જેલમાં બંધ

હાલ જેલમાં બંધ પાકિસ્તાનના પૂર્વ વડાપ્રધાન ઇમરાન ખાનને માનવાધિકાર અને લોકશાહી માટેના તેમના કાર્યોને કારણે નોબેલ શાંતિ પુરસ્કાર માટે નામાંકન મળ્યું છે. આ જાણકારી પાકિસ્તાન વર્લ્ડ એલાયન્સ (PWA) અને નોર્વેજીયન રાજકીય પાર્ટી સેન્ટ્રમે આપી છે.

PWA અને સેન્ટ્રમે કરી ઘોષણા

ગયા વર્ષે ડિસેમ્બરમાં સ્થપાયેલા એડવોકેસી ગ્રુપ પાકિસ્તાન વર્લ્ડ એલાયન્સ (PWA)ના સભ્યોએ ઇમરાન ખાનના નામાંકનની જાહેરાત કરી છે. આ સભ્યો નોર્વેની રાજકીય પાર્ટી સેન્ટ્રમના પણ સભ્યો છે. પાર્ટી સેન્ટ્રમે રવિવારે એક્સ પર જણાવ્યું, "અમને પાર્ટી સેન્ટ્રમ તરફથી આ જાહેરાત કરતાં આનંદ થાય છે કે નામાંકનનો અધિકાર ધરાવતી વ્યક્તિ સાથે ગઠબંધન કરીને પાકિસ્તાનના પૂર્વ વડાપ્રધાન ઇમરાન ખાનને પાકિસ્તાનમાં માનવાધિકાર અને લોકશાહી માટેના તેમના કામ માટે નોબેલ શાંતિ પુરસ્કાર માટે નામાંકિત કરવામાં આવ્યા છે." આ પહેલાં 2019માં પણ ઇમરાન ખાનને દક્ષિણ એશિયામાં શાંતિને પ્રોત્સાહન આપવાના તેમના પ્રયાસો માટે નોબેલ શાંતિ પુરસ્કાર માટે નામાંકિત કરાયા હતા.

આઠ મહિના બાદ થશે વિજેતાની જાહેરાત

એક્સપ્રેસ ટ્રિબ્યૂનના અહેવાલ મુજબ, દર વર્ષે નોર્વેજીયન નોબેલ સમિતિને સેંકડો નામાંકનો મળે છે, જે બાદ આઠ મહિનાની લાંબી પ્રક્રિયા દ્વારા વિજેતાની પસંદગી કરવામાં આવે છે. ઇમરાન ખાન, જેઓ પાકિસ્તાનની મુખ્ય વિપક્ષી પાર્ટી પાકિસ્તાન તહરીક-એ-ઇન્સાફ (PTI)ના સ્થાપક પણ છે, તેઓ ઓગસ્ટ 2023થી જેલમાં બંધ છે.

ભ્રષ્ટાચારના કેસમાં 14 વર્ષની સજા

આ વર્ષે જાન્યુઆરીમાં ઇમરાન ખાનને સત્તાના દુરુપયોગ અને ભ્રષ્ટાચાર સાથે સંબંધિત એક કેસમાં 14 વર્ષની જેલની સજા સંભળાવવામાં આવી હતી. આ તેમનો ચોથો મોટો કેસ હતો, જેમાં પૂર્વ વડાપ્રધાનને દોષી ઠેરવવામાં આવ્યા છે. જોકે, ઇમરાન ખાને પોતાના પર લાગેલા તમામ આરોપોને ફગાવી દીધા છે અને કહ્યું છે કે આ બધા કેસો રાજકીય પ્રેરિત છે.