સાઉદી અરેબિયા પર હૂથીઓનો ભીષણ મિસાઈલ અને ડ્રોન હુમલો, 13 લોકો ઘાયલ, જેદ્દાહ એરપોર્ટ બંધ અને અનેક શહેરોમાં હાઈ એલર્ટ

યમનના હૂથી વિદ્રોહીઓએ સાઉદી અરેબિયા પર ફરી એકવાર ભયાનક હુમલો કરી દીધો છે. હૂથીઓએ દક્ષિણ-પશ્ચિમ સાઉદી અરેબિયાના ખમીસ મુશૈત વિસ્તારમાં ડઝનબંધ મિસાઈલો અને ડ્રોન છોડ્યા છે. આ હુમલાનો મુખ્ય ટાર્ગેટ સાઉદીનું એક સૈન્ય એરબેઝ હતું, જેના કારણે સમગ્ર દેશમાં ભયનો માહોલ છવાઈ ગયો છે.

13 નાગરિકો ઘાયલ, અનેક શહેરોમાં ઇમરજન્સી

પ્રાપ્ત માહિતી અનુસાર, આ અચાનક થયેલા હુમલામાં 13 નાગરિકો ઘાયલ થયા છે. સ્થિતિની ગંભીરતાને જોતા સાઉદી અધિકારીઓએ ખમીસ મુશૈત, આભા, તાઇફ, જેદ્દાહ અને જાઝાન જેવા મહત્વના દક્ષિણી શહેરોમાં તાત્કાલિક ઇમરજન્સી એલર્ટ જાહેર કરી દીધું છે. જોકે, સાઉદી સિવિલ ડિફેન્સે રાહતના સમાચાર આપતા કહ્યું છે કે હાલ પૂરતો ખતરો ટળી ગયો છે અને સ્થિતિ કાબૂમાં છે.

જેદ્દાહ એરપોર્ટ પર ફ્લાઈટ્સ રોકાઈ, વાગ્યા સાયરન

હુમલાની અસર સીધી વાહનવ્યવહાર પર પડી છે. લાલ સમુદ્રના કાંઠે આવેલા યનબૂ અને તાઇફ શહેરોમાં ભયસૂચક સાયરન વાગ્યા હતા. સુરક્ષાના ભાગરૂપે જેદ્દાહ એરપોર્ટ પર તમામ ફ્લાઇટ્સ અસ્થાયી રૂપે રોકી દેવામાં આવી છે. રાજધાની રિયાધમાં આ કટોકટીનો સામનો કરવા માટે ઉચ્ચ સ્તરીય બેઠકોનો દોર શરૂ થઈ ગયો છે.

આ હુમલા પાછળનું કારણ શું છે?

તાજેતરમાં જ સાઉદી અરેબિયાએ યમનમાં એર સ્ટ્રાઇક કરી હતી. આ હુમલામાં યમનના વિમાન હેંગર, રડાર સિસ્ટમ, રનવે અને હથિયારોના ગોડાઉનને નિશાન બનાવવામાં આવ્યા હતા. હૂથીઓએ સ્પષ્ટ કર્યું છે કે સાઉદી અરેબિયા પરનો આ હાલનો હુમલો એ તેમની એર સ્ટ્રાઇકનો જ સીધો બદલો છે.