8મું પગાર આયોગ: મિનિમમ પેન્શન 9,000થી 25,000 થશે? પેન્શનર્સને શું આશા?

8th Pay Commission: સરકારી કર્મચારીઓ અને પેન્શનર્સ 8મા પગાર આયોગની આતુરતાથી રાહ જોઈ રહ્યા છે. આ આયોગની ભલામણો 1 જાન્યુઆરી, 2026થી લાગુ થઈ શકે છે. જોકે, હજુ સુધી સરકારે આયોગની રચના કરી નથી અને તેના કાર્યક્ષેત્ર (ટર્મ્સ ઓફ રેફરન્સ) પણ નક્કી થયા નથી. આમ છતાં, ચર્ચાઓ ચાલી રહી છે કે આ વખતે પેન્શન અને પગારમાં મોટા ફેરફારો થઈ શકે છે, જે લાખો કર્મચારીઓ અને પેન્શનર્સને આર્થિક રાહત આપશે.

પેન્શનમાં મોટો વધારો થશે?

અટકળો ચાલી રહી છે કે મિનિમમ બેઝિક પેન્શન 9,000થી વધીને 25,000 પ્રતિ માસ થઈ શકે છે. આ લગભગ ત્રણ ગણો વધારો હશે, જે પેન્શનર્સને મોટી આર્થિક સુરક્ષા આપશે. હાલમાં બેઝિક પેન્શન પર 58% મોંઘવારી ભથ્થું (DA) મળે છે. આ ઉપરાંત, યુનિફોર્મ પેન્શન સ્કીમને વધુ સરળ અને પારદર્શક બનાવવાની શક્યતા છે, જેથી પેન્શન મેળવવાની પ્રક્રિયા સરળ થાય.

પેન્શનની પાત્રતામાં ફેરફાર

હાલમાં, સંપૂર્ણ પેન્શન મેળવવા માટે 15 વર્ષની નોકરી જરૂરી છે. પરંતુ 8મા પગાર આયોગમાં આ નિયમમાં ફેરફાર થઈ શકે છે અને સંપૂર્ણ પેન્શન માટે 12 વર્ષની નોકરી પૂરતી ગણાશે. આ ફેરફારથી નોકરીની વચ્ચે નિવૃત્તિ લેનારા કર્મચારીઓને પણ નાણાકીય સ્થિરતા મળશે. આ ઉપરાંત, આ નિયમ સરકારી નોકરીઓમાં લાંબા સમય સુધી ટકી રહેવાને પ્રોત્સાહન આપશે. આ નિયમને મંજૂરી મળે તો હજારો કર્મચારીઓને ફાયદો થશે.

ફિટમેન્ટ ફેક્ટર અને પગારમાં વધારો

આ વખતે ફિટમેન્ટ ફેક્ટર 1.83થી 2.46ની વચ્ચે રહેવાની શક્યતા છે. ફિટમેન્ટ ફેક્ટર એ નક્કી કરે છે કે વિવિધ પે-મેટ્રિક્સ લેવલ પર કર્મચારીઓનો પગાર કેટલો વધશે. જો ફિટમેન્ટ ફેક્ટર વધુ હશે, તો કર્મચારીઓનો પગાર અને પેન્શનમાં નોંધપાત્ર વધારો થશે. આ ઉપરાંત, ગ્રેચ્યુટીની રકમ અને પ્રોવિડન્ટ ફંડમાં જમા થતી રકમમાં પણ વધારો થઈ શકે છે.