EPF Wage Ceiling Hike: મોદી કેબિનેટનો મોટો નિર્ણય, EPFની સેલરી લિમિટ 15,000 થી વધારી 25,000 કરી, 51 લાખ લોકોને સીધો ફાયદો

EPF Wage Ceiling Hike: નોકરિયાત વર્ગ માટે કેન્દ્ર સરકાર તરફથી એક ખૂબ જ મોટા અને રાહતના સમાચાર સામે આવ્યા છે. મોદી કેબિનેટે એમ્પ્લોઈઝ પ્રોવિડન્ટ ફંડ હેઠળ આવતા ફરજિયાત કવરેજ માટે માસિક પગારની મર્યાદા 15,000 થી વધારીને 25,000 કરવાની ઐતિહાસિક મંજૂરી આપી દીધી છે.

કેન્દ્રીય મંત્રી અશ્વિની વૈષ્ણવે કેબિનેટની પ્રેસ બ્રીફિંગમાં આ નિર્ણયની સત્તાવાર જાહેરાત કરી હતી. તેમણે જણાવ્યું કે સરકારના આ પગલાંથી દેશના સંગઠિત ક્ષેત્રના આશરે 51 લાખ કર્મચારીઓને સીધો સામાજિક સુરક્ષાનો લાભ મળશે. આ યોજના પાછળ સરકાર પોતાના ખજાનામાંથી 11,339 કરોડનો ખર્ચ ઉઠાવશે. નોંધનીય છે કે, 12 વર્ષના લાંબા ઇન્તજાર પછી PF ના નિયમોમાં આ મોટો સુધારો કરવામાં આવ્યો છે.

કેબિનેટના નિર્ણયની 3 મુખ્ય વાતો

EPFO હેઠળ ફરજિયાત PF અને પેન્શન કવરેજ માટે બેઝિક સેલરી અને મોંઘવારી ભથ્થાની મર્યાદા જે અત્યાર સુધી 15,000 હતી, તેને વધારીને સીધી 25,000 કરવામાં આવી છે. જે કર્મચારીઓનો પગાર 15,000 થી વધુ હોવાને કારણે અત્યાર સુધી PF ના ફરજિયાત દાયરાની બહાર હતા, તેમાંથી લગભગ 51 લાખ નવા કર્મચારીઓ હવે સીધા જ આ કવરેજમાં જોડાઈ જશે. કેન્દ્ર સરકાર કર્મચારીઓના પેન્શન ફંડમાં પોતાનો હિસ્સો વધારશે, જેના કારણે સરકાર પર કુલ 11,339 કરોડનો આર્થિક બોજો આવશે.

વેજ સીલિંગ શું છે?

સરળ ભાષામાં સમજીએ તો, વેજ સીલિંગ એટલે સરકારી નિયમ મુજબ નક્કી કરાયેલી પગારની મહત્તમ મર્યાદા. PF ના કિસ્સામાં આ એ લિમિટ છે, જે નક્કી કરે છે કે કંપનીએ કયા પગાર સુધીના કર્મચારીઓનું PF કાપવું કાયદાકીય રીતે ફરજિયાત છે. અત્યાર સુધી આ મર્યાદા 15,000 હતી, જે હવે 25,000 થઈ ગઈ છે. એટલે કે, હવે જે કર્મચારીની બેઝિક સેલરી 25,000 સુધી છે, તેઓ ફરજિયાતપણે PF અને પેન્શનના દાયરામાં આવશે અને તેમની સત્તાવાર કપાત આ નવી મર્યાદા મુજબ થશે.

તમારા પગાર અને બચત પર શું અસર થશે?