Union Budget 2026: મોદી કેબિનેટે બજેટને મંજૂરી આપી, થોડીવારમાં રજૂ થશે દેશનું બજેટ, નાણામંત્રી નિર્મલા સીતારમણ કરશે મોટા એલાન?

Union Budget 2026: દેશની આર્થિક દિશા નક્કી કરનારું સામાન્ય બજેટ (Union Budget) રજૂ થવાને હવે ગણતરીની મિનિટો બાકી છે. નાણામંત્રી નિર્મલા સીતારમણ આજે 1 ફેબ્રુઆરીએ સવારે 11 વાગ્યે સંસદમાં બજેટ રજૂ કરશે. આ સાથે જ તેઓ સતત 9મી વખત બજેટ રજૂ કરવાનો રેકોર્ડ પણ બનાવશે. 29 જાન્યુઆરીએ આર્થિક સર્વે રજૂ થયા બાદ આજે સૌની નજર નાણામંત્રીના પટારા પર છે.

બજેટ પાસેથી દેશને શું છે અપેક્ષાઓ?

આ વખતનું બજેટ એવા સમયે આવી રહ્યું છે જ્યારે વૈશ્વિક સ્તરે ઉથલપાથલ ચાલી રહી છે. એક તરફ અમેરિકા ટેરિફ લગાવી રહ્યું છે, તો બીજી તરફ ભારતમાં ઘરેલુ માંગ સતત વધી રહી છે. મધ્યમ વર્ગ (Middle Class), નોકરિયાત લોકો અને ખેડૂતો આતુરતાથી રાહ જોઈ રહ્યા છે કે તેમને મોંઘવારીમાંથી રાહત મળશે કે નહીં. શું ઈનકમ ટેક્સ સ્લેબમાં કોઈ ફેરફાર થશે? શું સરકાર આ વખતે ડિફેન્સ, રિસર્ચ અને ઈન્ફ્રાસ્ટ્રક્ચર માટે પોતાની તિજોરી ખોલશે? તેના પર સૌની નજર છે.

આર્થિક સર્વેના સંકેત

બજેટ પહેલા રજૂ થયેલા ઇકોનોમિક સર્વે (Economic Survey 2025-26) માં ભારતીય અર્થવ્યવસ્થાનું ઉજળું ચિત્ર રજૂ કરવામાં આવ્યું હતું. સર્વે મુજબ, આગામી નાણાકીય વર્ષમાં ભારતનો વિકાસ દર (Growth Rate) 6.8 થી 7.2 ટકા રહેવાનો અંદાજ છે. વધતી ઘરેલુ માંગને જોતા એવી અટકળો છે કે આ બજેટમાં સરકાર રોજગાર વધારવા પર વિશેષ ભાર મૂકી શકે છે.

વિપક્ષને બજેટથી કોઈ આશા નથી

બીજી તરફ, સંસદમાં જતા સમયે વિરોધ પક્ષના નેતાઓએ બજેટ અંગે નિરાશા વ્યક્ત કરી હતી. કોંગ્રેસ સાંસદ પ્રિયંકા ગાંધીએ કહ્યું કે, "અમને આ બજેટ પાસેથી કોઈ ખાસ આશા નથી." સમાજવાદી પાર્ટીના સાંસદ રામગોપાલ યાદવે પણ આવો જ સૂર પુરાવતા કહ્યું કે તેમને પણ બજેટથી કોઈ અપેક્ષા નથી.