એપલનો ભારત પ્રત્યેનો વિશ્વાસ અડગ, ટ્રમ્પની ટીકા છતાં રોકાણ યોજનાઓમાં કોઈ ફેરફાર નહીં

અમેરિકી ટેકનોલોજી કંપની એપલે ભારતમાં પોતાના રોકાણ અને પ્રોડક્શન યોજનાઓને ચાલુ રાખવાની પ્રતિબદ્ધતા દર્શાવી છે. અમેરિકાના રાષ્ટ્રપતિ ડોનાલ્ડ ટ્રમ્પે ભારતમાં એપલના વધતા પ્રોડક્શન પર ટીકા કરી હોવા છતાં, કંપનીએ ભારત સરકારને સ્પષ્ટ કર્યું છે કે તેમની યોજનાઓમાં કોઈ ફેરફાર થશે નહીં. એપલ ભારતને પોતાનું મહત્ત્વનું પ્રોડક્શન કેન્દ્ર ગણે છે અને આગળ પણ રોકાણ વધારવા માટે પ્રતિબદ્ધ છે.

ટ્રમ્પે શું કહ્યું?

ડોનાલ્ડ ટ્રમ્પે તાજેતરમાં કતારના દોહામાં એક બિઝનેસ ઇવેન્ટ દરમિયાન એપલના સીઈઓ ટિમ કૂક સાથેની વાતચીતનો ઉલ્લેખ કર્યો. તેમણે કહ્યું, "મેં ટિમ કૂકને કહ્યું કે ભારતમાં પ્રોડક્શન કરવાને બદલે એપલે અમેરિકામાં પોતાનું પ્રોડક્શન વધારવું જોઈએ. ભારત પોતાની જાતે સંભાળી શકે છે." ટ્રમ્પનું આ નિવેદન એપલના ભારતમાં વધતા પ્રોડક્શન પર નારાજગી દર્શાવે છે.

એપલનો ભારત પ્રેમ

ભારત એપલ માટે એક મહત્ત્વનું પ્રોડક્શન કેન્દ્ર બની ગયું છે. માર્ચ 2025માં પૂરા થયેલા નાણાકીય વર્ષમાં એપલે ભારતમાં લગભગ 22 અબજ ડોલરના આઈફોનનું પ્રોડક્શન કર્યું, જે ગયા વર્ષની સરખામણીએ 60%નો વધારો દર્શાવે છે. હાલમાં, વિશ્વભરમાં વેચાતા દર પાંચ આઈફોનમાંથી એક ભારતમાં બને છે. આ ઉપરાંત, એપલના સપ્લાયર્સ જેવા કે ફોક્સકોન અને ટાટા ઇલેક્ટ્રોનિક્સ ભારતમાં મોટા પાયે પ્રોડક્શન કરી રહ્યા છે.

ભારતનો ઇલેક્ટ્રોનિક્સ ઉદ્યોગ આશાવાદી

ટ્રમ્પની ટીકા બાદ પણ ભારતનો ઇલેક્ટ્રોનિક્સ ઉદ્યોગ આશાવાદી છે. ઇલેક્ટ્રોનિક ઇન્ડસ્ટ્રીઝ એસોસિયેશન ઓફ ઇન્ડિયા (ELCINA)ના મહાસચિવ રાજૂ ગોયલે જણાવ્યું, "ટ્રમ્પનું નિવેદન માત્ર એક નિવેદન છે. તેનાથી થોડી અસર થઈ શકે, પરંતુ ભારતના પ્રોડક્શન ક્ષેત્રને મોટું નુકસાન થશે નહીં." તેમણે એમ પણ કહ્યું કે ટ્રમ્પ આગળ જતાં પોતાનો વલણ બદલી શકે છે.