TCS layoffs: TCSની 12,000 કર્મચારીઓની છટણી પર કર્ણાટક સરકારનો સવાલ, વાતચીત માટે અધિકારીને બોલાવ્યા

TCS layoffs: કર્ણાટક સરકારે ટાટા ગ્રૂપની અગ્રણી IT કંપની ટાટા કન્સલ્ટન્સી સર્વિસેઝ (TCS)ને 12,000 કર્મચારીઓની છટણીનું કારણ જણાવવા માટે બોલાવ્યું છે. કર્ણાટકના શ્રમ મંત્રી સંતોષ લાડે જણાવ્યું કે, “અમને ખબર પડી કે TCS આશરે 12,000 કર્મચારીઓની છટણી કરવાની તૈયારીમાં છે. આ મામલે સ્પષ્ટતા માટે અમે TCSના અધિકારીઓને બોલાવ્યા છે.”

છટણીની જાહેરાત અને કર્મચારીઓની સંખ્યા

TCSએ તાજેતરમાં તેના ગ્લોબલ વર્કફોર્સના લગભગ 2 ટકા એટલે કે આશરે 12,261 કર્મચારીઓની છટણીની જાહેરાત કરી છે. આમાં મોટાભાગના મધ્યમ અને વરિષ્ઠ કક્ષાના કર્મચારીઓનો સમાવેશ થાય છે. જૂન 2025 સુધીમાં TCSમાં કુલ 6,13,069 કર્મચારીઓ હતા, જેમાંથી ચાલુ નાણાકીય વર્ષની એપ્રિલ-જૂન ત્રિમાસિકમાં 5,000 નવા કર્મચારીઓની ભરતી કરવામાં આવી હતી.

TCSનું નિવેદન

TCSએ પોતાના નિવેદનમાં જણાવ્યું કે આ છટણી તેમની ‘ફ્યુચર-રેડી ઓર્ગેનાઈઝેશન’ બનવાની વ્યૂહરચનાનો એક ભાગ છે. આ વ્યૂહરચનામાં ટેક્નોલોજી, AI ડિપ્લોયમેન્ટ, માર્કેટ એક્સપાન્શન અને વર્કફોર્સ રિસ્ટ્રક્ચરિંગ પર ફોકસ કરવામાં આવ્યું છે.

કર્ણાટક સરકારની શરતો

શ્રમ મંત્રી સંતોષ લાડે જણાવ્યું કે, “અમે સનરાઈઝ ઈન્ડસ્ટ્રીઝને શ્રમ કાયદાઓમાંથી છેલ્લા પાંચ વર્ષથી દર વર્ષે છૂટ આપી રહ્યા છીએ, પરંતુ તેની સાથે કેટલીક શરતો પણ જોડાયેલી છે.” તેમણે ઉમેર્યું કે, “જો કોઈ કંપની કર્મચારીઓની છટણી કરવા માંગે છે, તો તેમણે અમને જાણ કરવી પડશે. અમે આ શરતોના આધારે TCS સાથે ચર્ચા કરી રહ્યા છીએ.”