Work Culture India: નારાયણમૂર્તિની 72 કલાક કામની સલાહ, ચીનના '9-9-6' નિયમનો ઉલ્લેખ, જાણો શું છે આ વિવાદ?

Narayana Murthy: ભારતની બીજી સૌથી મોટી આઈટી કંપની ઇન્ફોસિસ (Infosys) ના સહ-સ્થાપક એનઆર નારાયણમૂર્તિ (NR Narayana Murthy) ફરી એકવાર તેમના નિવેદનને કારણે ચર્ચામાં આવ્યા છે. તેમણે અગાઉ અઠવાડિયામાં 70 કલાક કામ કરવાની વકીલાત કરી હતી, પરંતુ હવે તેમણે યુવાનોને અઠવાડિયામાં 72 કલાક કામ કરવાનો સૂચન આપ્યો છે, જેના કારણે સોશિયલ મીડિયા પર એક નવી ચર્ચા શરૂ થઈ ગઈ છે. પોતાના આ સૂચનને યોગ્ય ઠેરવવા માટે તેમણે ચીનના વિવાદાસ્પદ '9-9-6' વર્ક કલ્ચરનું ઉદાહરણ આપ્યું છે.

79 વર્ષીય નારાયણમૂર્તિએ એક ટીવી ચેનલને આપેલા ઇન્ટરવ્યુમાં જણાવ્યું કે, "મારા અનુભવમાં એક વાત સ્પષ્ટ છે કે કોઈપણ વ્યક્તિ, સમુદાય કે દેશ સખત મહેનત વિના પ્રગતિ કરી શક્યો નથી." તેમણે યુવાનોને સલાહ આપી કે પહેલા પોતાના જીવનને વધુ સારું બનાવવું જોઈએ અને પછી વર્ક-લાઈફ બેલેન્સની ચિંતા કરવી જોઈએ.

પોતાની વાતને સમર્થન આપવા માટે તેમણે ચીનમાં પ્રચલિત '9-9-6' નિયમનો ઉલ્લેખ કર્યો. તેમણે જણાવ્યું કે ગયા વર્ષે તેમની કંપનીના સિનિયર કર્મચારીઓ ચીનની મુલાકાતે ગયા હતા, જ્યાં તેમણે આ વર્ક કલ્ચરને નજીકથી જોયું. તેમણે વડાપ્રધાન નરેન્દ્ર મોદીનું ઉદાહરણ આપતા કહ્યું કે, "PM Narendra Modi અઠવાડિયામાં 100 કલાક કામ કરે છે, જે યુવાનો માટે એક પ્રેરણા છે."

શું છે ચીનનો વિવાદાસ્પદ '9-9-6' નિયમ?

નારાયણમૂર્તિએ જે ચીનના '9-9-6' નિયમનો ઉલ્લેખ કર્યો છે, તેનો અર્થ છે સવારે 9 વાગ્યાથી રાત્રે 9 વાગ્યા સુધી, અઠવાડિયામાં 6 દિવસ કામ. આ હિસાબે કુલ કામકાજના કલાકો અઠવાડિયામાં 72 થાય છે. આ વર્ક કલ્ચર ચીનની કેટલીક મોટી આઈટી કંપનીઓમાં ખૂબ જ સામાન્ય હતું. જોકે, આ નિયમના કારણે કર્મચારીઓમાં માનસિક તણાવ, થાક, સ્વાસ્થ્ય સમસ્યાઓ અને વર્ક-લાઈફ બેલેન્સની ગંભીર સમસ્યાઓ ઊભી થઈ હતી. આ મુદ્દાઓને ધ્યાનમાં રાખીને ખુદ ચીનની સરકારે આ '9-9-6' પ્રણાલીને ગેરકાયદેસર જાહેર કરી દીધી છે.

સોશિયલ મીડિયા પર લોકોની પ્રતિક્રિયાઓ

નારાયણમૂર્તિના 72 કલાક કામ કરવાના સૂચન પછી સોશિયલ મીડિયા પર લોકો અલગ-અલગ પ્રતિક્રિયાઓ આપી રહ્યા છે. એક યુઝરે લખ્યું, "સર, તમારો વિચાર સારો છે, પણ પહેલા ચીન જેવો પગાર, ઇન્ફ્રાસ્ટ્રક્ચર અને જીવનનિર્વાહનો ખર્ચ આપો, પછી 72 કલાકની વાત કરજો." અન્ય એક યુઝરે કહ્યું કે ભારતમાં લોકોને 72 કલાકના વર્ક વીકની જરૂર નથી, કારણ કે લોકો પહેલેથી જ આર્થિક સંઘર્ષ કરી રહ્યા છે. ઘણા લોકોએ આ પ્રણાલીને ચીનના લેબર કાયદાનું ઉલ્લંઘન અને 'આધુનિક ગુલામી' ગણાવી છે. આ નિવેદનથી ફરી એકવાર ભારતમાં વર્ક કલ્ચર અને કામના કલાકોને લઈને ચર્ચાએ જોર પકડ્યું છે.