BJP president election: ભાજપની રાષ્ટ્રીય અને પ્રદેશ અધ્યક્ષની ચૂંટણીમાં વિલંબ: આ છે મુખ્ય કારણો

BJP president election: ભારતીય જનતા પાર્ટી (BJP) રાષ્ટ્રીય અધ્યક્ષ અને ગુજરાત સહિત પાંચ રાજ્યોના પ્રદેશ પ્રમુખની ચૂંટણી મામલે મૂંઝવણમાં છે. પાર્ટીના રાષ્ટ્રીય અધ્યક્ષ જેપી નડ્ડાનો કાર્યકાળ ગયા વર્ષે જૂનમાં પૂરો થયો હોવા છતાં, નવા અધ્યક્ષની વરણી હજુ થઈ નથી. આ ઉપરાંત, ગુજરાત, ઉત્તર પ્રદેશ, મધ્યપ્રદેશ, કર્ણાટક અને તેલંગાણા જેવા મહત્વના રાજ્યોમાં પ્રદેશ પ્રમુખોની નિમણૂક પણ અટકી પડી છે. આ વિલંબની પાછળના કારણો રાજકીય ગલિયારાઓમાં ચર્ચાનો વિષય બન્યા છે.

શા માટે થઈ રહ્યો છે વિલંબ?

ભાજપના બંધારણ મુજબ, રાષ્ટ્રીય અધ્યક્ષની ચૂંટણી માટે અડધાથી વધુ રાજ્યોમાં પ્રદેશ પ્રમુખોની નિમણૂક પૂર્ણ થવી જરૂરી છે. હાલમાં 37 રાજ્યો અને કેન્દ્રશાસિત પ્રદેશોમાંથી 14 રાજ્યોમાં નવા પ્રદેશ પ્રમુખોની નિમણૂક બાકી છે. આ ઉપરાંત, પહેલગામમાં આતંકી હુમલા અને તેના જવાબમાં ચાલી રહેલા ‘ઓપરેશન સિંદૂર’ના કારણે પાર્ટીનું ધ્યાન તિરંગા યાત્રા જેવા કાર્યક્રમો પર કેન્દ્રિત થયું છે. આ સ્થિતિમાં અધ્યક્ષોની ચૂંટણી પ્રક્રિયા થોડી મોડી થઈ શકે છે.

ભાજપના સૂત્રોનું માનીએ તો, અનેક રાજ્યોમાં આંતરિક ખેંચતાણ અને નેતાઓ વચ્ચેના મતભેદો પણ આ વિલંબનું એક મોટું કારણ છે. ખાસ કરીને ગુજરાત અને ઉત્તર પ્રદેશ જેવા રાજકીય રીતે મહત્વના રાજ્યોમાં નેતૃત્વની પસંદગી અંગે નિર્ણય લેવામાં મુશ્કેલી આવી રહી છે.

ગુજરાતમાં પ્રદેશ પ્રમુખની રેસમાં કોણ?

ગુજરાત, જે ભાજપનો ગઢ ગણાય છે, ત્યાં પ્રદેશ પ્રમુખની પસંદગીને લઈને નેતૃત્વમાં મૂંઝવણ જોવા મળે છે. વર્તમાન પ્રદેશ પ્રમુખ સી.આર. પાટિલ, જેઓ કેન્દ્રીય જળ શક્તિ પ્રધાન પણ છે, તેમની જગ્યાએ કોઈ મજબૂત નેતાની જરૂર છે કે લો-પ્રોફાઈલ ચહેરો પસંદ કરવો તે અંગે નેતૃત્વ નિર્ણય લઈ શક્યું નથી.

ગુજરાતમાં આંતરિક મુદ્દાઓએ પણ પાર્ટીની મુશ્કેલી વધારી છે. રાજકોટમાં સંગઠનાત્મક પ્રભારી ધવલ દવે દ્વારા નિમણૂકોમાં ગેરરીતિના આરોપો, સાબરકાંઠામાં ભુપેન્દ્રસિંહ ઝાલાનું નામ પોંજી કૌભાંડ સાથે જોડાવું અને મનરેગા કૌભાંડમાં મંત્રી બચુભાઈ ખાબડના પુત્રોની ધરપકડે પાર્ટીની ચિંતા વધારી છે.