US Visa Rules: જો તમે અમેરિકા જવાનું સપનું જોઈ રહ્યા હોવ અથવા કોઈ પ્લાન બનાવી રહ્યા હોવ, તો આ સમાચાર તમારા માટે ખૂબ જ મહત્વના છે. અમેરિકા જવા માટેની વિઝા પ્રક્રિયા હવે પહેલા કરતા વધુ મુશ્કેલ અને ખર્ચાળ બની ગઈ છે. અમેરિકી પ્રશાસને વિઝા નીતિમાં મોટો ફેરફાર કરતા અમુક ચોક્કસ દેશોના નાગરિકો માટે કડક નિયમો લાગુ કર્યા છે.
અમેરિકા જવું બન્યું મોંઘું: હવે વિઝા માટે ભરવા પડશે 15,000 ડોલર સુધીના બોન્ડ, જાણો શું તમારા પર થશે અસર?
US Visa Rules: અમેરિકાએ વિઝા નિયમો કડક કર્યા છે. હવે 13 દેશોના નાગરિકોએ વિઝા માટે 15,000 ડોલર સુધીનો બોન્ડ ભરવો પડશે. જાણો આ યાદીમાં કયા દેશો સામેલ છે અને રિફંડના નિયમો શું છે.
MoneyControl Newsઅપડેટેડ Jan 07, 2026 પર 1:24 PM
નવા નિયમ મુજબ, હવે વિઝા અરજી સમયે અરજદારોએ 5,000થી 15,000 ડોલર સુધીનું બોન્ડ જમા કરાવવું પડશે. આ નવો નિયમ 1 જાન્યુઆરીથી લાગુ થઈ ગયો છે.
કયા દેશો પર થશે અસર?
અમેરિકી વિદેશ વિભાગની વેબસાઈટ travel.state.gov પર આપેલી માહિતી મુજબ, આ નિયમમાં નવા 7 દેશોનો ઉમેરો કરવામાં આવ્યો છે. હવે કુલ 13 દેશોના નાગરિકો આ નવા બોન્ડના નિયમ હેઠળ આવશે.
નવા ઉમેરાયેલા 7 દેશો
ભૂટાન (Bhutan)
બોત્સ્વાના (Botswana)
સેન્ટ્રલ આફ્રિકન રિપબ્લિક (Central African Republic)
ગિની (Guinea)
ગિની-બિસાઉ (Guinea-Bissau)
નામીબિયા (Namibia)
તુર્કમેકિસ્તાન (Turkmenistan)
આ પહેલા ઓગસ્ટ અને ઓક્ટોબર મહિનામાં મૌરિટાનિયા, સાઓ ટોમે એન્ડ પ્રિન્સિપ, તાન્ઝાનિયા, ગામ્બિયા, મલાવી અને ઝામ્બિયા જેવા દેશોને આ લિસ્ટમાં મૂકવામાં આવ્યા હતા. આમાંના મોટાભાગના દેશો આફ્રિકન મહાદ્વીપના છે. ભારતનું નામ હાલ આ યાદીમાં નથી, જે ભારતીયો માટે રાહતના સમાચાર છે.
વિઝા પ્રક્રિયામાં શું ફેરફાર થયા?
ફક્ત પૈસા ભરવાથી કામ પતશે નહીં, પણ હવે પ્રોસેસ પણ કડક કરવામાં આવી છે.
વ્યક્તિગત ઈન્ટરવ્યુ: ઘણા અરજદારો માટે હવે રૂબરૂ (Personal) ઈન્ટરવ્યુ આપવો ફરજિયાત કરવામાં આવ્યો છે.
સોશિયલ મીડિયા ચેકિંગ: વિઝા ઓફિસરો હવે તમારા સોશિયલ મીડિયા એકાઉન્ટ્સની વિગતો પણ માંગી રહ્યા છે.
અન્ય વિગતો: તમારી કૌટુંબિક પૃષ્ઠભૂમિ અને તમે અગાઉ ક્યાં ક્યાં રહ્યા છો, તેની પણ ઝીણવટભરી તપાસ કરવામાં આવશે.
અમેરિકી અધિકારીઓના જણાવ્યા મુજબ, આ પગલાં લેવાનો મુખ્ય હેતુ એ સુનિશ્ચિત કરવાનો છે કે જે લોકો ટુરિસ્ટ કે બિઝનેસ વિઝા પર આવે છે, તેઓ સમયસર પાછા જાય અને ત્યાં ગેરકાયદેસર રીતે રોકાઈ ન જાય.
શું બોન્ડના પૈસા પાછા મળશે?
ઘણા લોકોના મનમાં સવાલ હશે કે શું આ પૈસા ફી તરીકે લેવામાં આવે છે? તો જવાબ છે - ના. અમેરિકી પ્રશાસને સ્પષ્ટતા કરી છે કે આ રકમ એક 'સુરક્ષા ડિપોઝિટ' છે. જો કોઈ કારણસર તમારો વિઝા રિજેક્ટ (નામંજૂર) થાય છે, તો આ રકમ પરત મળી જશે. જો તમને વિઝા મળે અને તમે અમેરિકા જઈને વિઝાની શરતો મુજબ સમયસર પાછા ફરો છો, તો પણ જમા કરેલી રકમ પાછી આપવામાં આવશે. ટૂંકમાં, આ નવા નિયમોનો ઉદ્દેશ્ય અમેરિકામાં ગેરકાયદેસર ઈમિગ્રેશન રોકવાનો છે. જોકે, આ 13 દેશોના નાગરિકો માટે હવે અમેરિકાની મુસાફરી પહેલા કરતા વધુ જટિલ અને આર્થિક રીતે બોજારૂપ બની ગઈ છે.
પહેલા મનીકંટ્રોલ ગુજરાતી પર ગુજરાતીમાં સ્ટોક માર્કેટ, Stock Tips, સમાચાર, પર્સનલ ફાઇનાન્સ અને બિઝનેસ સંબંધિત સમાચાર વાંચો. દૈનિક બજાર અપડેટ્સ માટે Moneycontrol App ડાઉનલોડ કરો.