India GDP Growth FY27: ભારતીય અર્થતંત્રને લાગશે ઝટકો! મૂડીઝે FY27 માટે GDP ગ્રોથનો અંદાજ ઘટાડીને 6% કર્યો, જાણો શું છે કારણ

India GDP Growth FY27: પશ્ચિમ એશિયામાં ચાલી રહેલા તણાવ અને ખાસ કરીને ઈરાન તથા અમેરિકા-ઇઝરાયેલ વચ્ચેના ઘર્ષણની અસર હવે દુનિયાભરના દેશો પર પડતી દેખાઈ રહી છે. આ વૈશ્વિક સંકટને જોતા જાણીતી રેટિંગ એજન્સી મૂડીઝ (Moody's) એ ભારતીય અર્થવ્યવસ્થાના વિકાસ દર અંગે મોટો ખુલાસો કર્યો છે. મૂડીઝે નાણાકીય વર્ષ 2027 (FY27) માટે ભારતના જીડીપી (GDP) ગ્રોથના અંદાજમાં મોટો કાપ મૂક્યો છે.

ચાલો સરળ શબ્દોમાં સમજીએ કે મૂડીઝે આ કાપ કેમ મૂક્યો અને તેની આપણા ખિસ્સા પર શું અસર પડી શકે છે.

ગ્રોથ રેટ 6.8%થી ઘટાડીને 6% કરાયો

મૂડીઝ રેટિંગ્સના નવા રિપોર્ટ મુજબ, નાણાકીય વર્ષ 2027 માં ભારતીય અર્થતંત્ર 6.8%ની ઝડપે નહીં, પરંતુ માત્ર 6%ની ઝડપે આગળ વધશે. એજન્સીનું સ્પષ્ટ માનવું છે કે ઈરાન અને અમેરિકા-ઇઝરાયેલ વચ્ચે ચાલી રહેલા યુદ્ધને કારણે વિકાસની ગતિ ધીમી પડશે અને મોંઘવારીનો ખતરો વધશે.

જો આ યુદ્ધ લાંબો સમય ચાલશે, તો સપ્લાય ચેઈન ખોરવાઈ જશે. જેના કારણે ગેસની અછત સર્જાઈ શકે છે અને ક્રૂડ ઓઈલ મોંઘુ થઈ શકે છે. ભારત ખાતરોની આયાત પર નિર્ભર હોવાથી ફૂડ ઇન્ફ્લેશન (ખાવા-પીવાની વસ્તુઓની મોંઘવારી) પણ વધી શકે છે. નોંધનીય છે કે, ભારત પોતાની જરૂરિયાતનું 55% કાચું તેલ અને 90% થી વધુ LPG યુદ્ધ પ્રભાવિત એશિયાઈ વિસ્તારોમાંથી જ મંગાવે છે.

મોંઘવારી અને રિઝર્વ બેંકના રેપો રેટ પર અસર

જોકે હાલમાં દેશમાં મોંઘવારી કંટ્રોલમાં છે, પરંતુ જીયો-પોલિટિકલ ટેન્શનને કારણે તે અચાનક વધી શકે છે. મૂડીઝના અંદાજ મુજબ, નાણાકીય વર્ષ 2025-26 માં મોંઘવારીનો સરેરાશ દર 2.4% રહેશે, જે નાણાકીય વર્ષ 2026-27 માં સીધો વધીને 4.8% થઈ શકે છે. મોંઘવારી વધવાના ડરથી રિઝર્વ બેંક ઓફ ઈન્ડિયા (RBI) 2026-27 માં રેપો રેટને કાં તો સ્થિર રાખી શકે છે અથવા તેમાં ધીમે-ધીમે વધારો કરી શકે છે. જો રેપો રેટ વધે તો સામાન્ય માણસની લોન અને EMI પણ મોંઘા થઈ શકે છે.